Ресейдегі дилерлер утиль алымы тым қымбат деп санайды

Ресей дилерлер ассоциациясы (РДА) Өнеркәсіп және сауда министрлігі мен Қаржы министрлігіне хат жолдап, утиль алымынан түскен қаражат кімге, қандай тәртіппен және қандай көлемде бөлінетінін түсіндіруді сұрады.

«Біз утиль алымы қайда жұмсалатынын түсінуге тырысып жатырмыз, себебі алым көлемі өндіріс шығынынан асып түседі және утилизацияға кететін нақты шығынмен ешқандай байланысы жоқ», — деді ассоциация өкілі.

Ұйым екі жарым жылда Ресейде жаңа көлік екі есе қымбаттады, ал 2030 жылға қарай баға екі есе өсуі мүмкін деді. Жаңа көлік сатып алатындардың үлесі 5-7 %-дан аспауы мүмкін, тиісінше дилерлік желі саны да күрт азаяды. 2014 жылы әрбір үшінші Ресей тұрғыны салоннан жаңа машина алатын еді.

АВТОВАЗ утилизациялық алымды көтеруді қолдап отыр. Оның ресми өкілі РДА-ның өтінішін «үрейге толы және дәлелсіз» деп атап, пікір білдіруден бас тартты. Биыл мамырда Тольяттидегі компания автомобиль құнын көтерген, тамыз-қыркүйекте баға тағы өседі деген болжам бар.

Алымды көтеруді қолдайтындардың басты уәжі — Қытай автоөндірушілерін Ресей аумағына «жайғастырып», ынтымақтастық барысында технология алмасу. Ресей сарапшылары қытайлар толық локализацияға дайын екеніне күмәнді, олар қазір ұсақ торапты әдіспен құрастырумен ғана шектеліп отыр.

Үкімет те жоспарланған шараның тиімділігіне толық сенімді емес сияқты. Министрліктің баспасөз қызметі «Газета.Ru» басылымына Өнеркәсіп және сауда министрлігі әлі утилизациялық алым сомасын арттыру туралы түпкілікті шешім қабылдамағанын хабарлады. Олар нарықтағы сауда қарқынын талдап жатқанын айтты.