Ресейдегі бұрынғы Toyota зауыты микрокар шығарады

Ресейден кеткен Toyota-ның Санкт-Петербургтегі зауыты «Алмаз-Антей» концерні құрамындағы Обухов зауытының басқаруына өтті. Кәсіпорын жүк көлігі мен E-Neva электромобилін шығаруды жоспарлаған. Жақында тағы бір жаңа жоба туралы белгілі болды.

2024 жылы мамандар қағаз жүзінде квадрицикл саналатын L7e санатындағы электрокар шығара бастайды екен. Микромобильдің жылдамдығы сағатына 90 шақырымға жетеді, жүріс қоры — 180 км. Бұндай машинаны алыс жолға шықпайтын компаниялар алады деген болжам бар.

Зауыт бастапқыда жылына 2 мың электрокар өндіреді, ал кейін бұл көрсеткішті 10–14 мыңға жеткізуді жоспарлап отыр. Шағын көліктің сырт пішіні қандай болатыны қазірше белгісіз, зауыт мамандары алғашқы нұсқаны мамырдың аяғында көрсетеді.

«Алмаз-Антей» концерні Toyota зауытын қайта жабдықтап, өндірісті жандандыруға мықтап кіріскен. Ол үшін 35–37 млрд рубль бөлді.