Ресейде утиль алымы 70 % өсуі мүмкін

Ресейде утиль алымының мөлшері артуы мүмкін. Бұл туралы 30 мамыр күні Drom.ru жазды. Басылым таратқан ақпаратқа сүйенсек, АВТОВАЗ төлемді бірден 70 % ұлғайтуды ұсыныпты. Концерн басшылары ірі торапты әдіспен көлік құрастырып жатқан Қытай автоөндірушілерінің екпінін осылай басуды көздеп отырған сияқты.

31 мамыр күні компания басшысы Максим Соколов утиль алымын өсіруді және өтемақы төлеу әдісін өзгертуді қолдайтынын мәлімдеді. Оның айтуынша сома 70 % артса, қозғалтқыш көлемі 1-2 литр болатын жеңіл машиналар үшін 178 мың орнына 300 мың рубль сұралады.

Бұл шара тек ірі импорттаушылар мен автоөндірушілерді қамтиды-мыс, ал өзі мінем деп сырттан көлік тасығандар бұрынғы тарифпен алым-салық төлейді.

Ресейде де автоөндірушілердің утиль алмына кеткен шығынын мемлекет өтейді. Көрші елде мемлекет қайтаратын сома модельдің локализациясына байланысты және балл арқылы есептеледі. АВТОВАЗ бұл әдісті де қайта қарау керек деп санайды.

Егер ұсыныс қабылданса, Ресейде ірі торапты әдіспен автомобиль шығарып жатқан Қытай брендтері мен CKD тәсілімен техника құрастырса да, шетелдік бөлшектерді көптеп қолданатын кәсіпорындардың жағдайы қиындайды. Салдарынан олардың өнімі 300 мың рубльге қымбаттайды.