Ресей өнеркәсіп және сауда министрлігі 2030 жылға дейін утиль алымын кезең-кезеңмен көтеру механизмін бекітті. 1 қазаннан бастап мөлшерлеме көлік категориясына қарай 70-85 % жоғарылайды, кейін жыл сайын 10-20 % артатын болады. Нарық сарапшылары баға күрт өсіп, сауда біртіндеп төмендейді деп болжады.
Жеңіл автомобиль, жеңіл коммерциялық көлік, жүк көлігі және әртүрлі арнайы техника үшін утилизациялық алым өседі. Басқа категориялар үшін алым 2025 және 2028 жылдарға дейін бұрынғы мөлшерде қалады, бірақ сұранысқа ие категориядан сұралатын утиль алымы биыл күзде күрт жоғарылайды.
Мысалы, Ресейге қозғалтқыш көлемі 1 литрге дейінгі автомобиль жеткізетіндер 81.2 мың (430 мың теңге) емес, 150.2 мың рубль (796 мың теңге) төлейді, ал 1-2 литрлік моторы бар көлік үшін сұралатын 306 мың (1.6 млн теңге) орнына 556.2 мың рубль (2.9 млн теңге) беру қажет болады. Қозғалтқыш көлемі үлкен жеңіл көлік кіргізу тіпті қымбатқа соғады: көлемі 3.5 литрден асатын автомобиль үшін мөлшерлеме 2030 жылға қарай шамамен 5 млн рубльге (26.5 млн теңге) жетеді.
Ресейге қайта сату үшін импортталатын автомобильдердің утиль алымы өседі. Жеке қолдану мақсатында машина жеткізетіндер 3.4 мың рубльден (18 мың теңге) 5.2 мың рубльге (27.5 мың теңге) дейінгі мөлшерде ақы төлейді, және оны жуық арада индекстеу көзделмеген.
Жазда басталған тариф өсіру жоспары әлі күшінде. Бұл шетелдік компанияларды Ресей аумағында көлік өндіруге ынталандырады деген болжам бар. Сарапшылар тариф көп ұзамай жаңа автомобиль саудасын бәсеңдетеді деп санайды. Өйткені машина құны жаңа жылда тағы өседі. Ал дилерлер орталық банк әдеттегідей негізгі мөлшерлемесін көтеретіндіктен, кредит қымбаттап, салдарынан клиент азаяды деп қауіптеніп отыр. Ресей билігі жағдайды сәл де болса жақсарту үшін жеңілдікпен кредит рәсімдеуге мүмкіндік беретін бағдарламаға ондаған миллиард доллар бөледі.
Утиль алымы өсетіні қазір ғана расталғанмен, нарық оған әлдеқашан дайын болған сияқты. Тамызда Ресейде жеңіл машинаның саудасы қызып, 2015 жылғы нәтижемен теңесті. Қыркүйекте де көлік көптеп өтетіні анық. Күздің басында Ресей мен Қытай шекарасында көп күндік кептеліс болды деген ақпарат тараған. Дилерлер алдағы қымбатшылыққа дайындалу үшін қор жинауға тырысып жатқан көрінеді. Әзірше Өнеркәсіп және сауда министрлігінің бұл шешімін АВТОВАЗ ғана қолдады.
Комментариев: 0