АВТОВАЗ жаңа брендтің логотипін патенттеді

Ресейдің патент ведомствосының ашық базасында жаңа автомобиль логотипін тіркеу өтінімі шықты. Оны АВТОВАЗ-дың құрамына кіретін «Автозавод Санкт-Петербург» кәсіпорны беріпті. Белгінің екі нұсқасы патенттелді, ол Nissan-ның бұрынғы зауытында
жасалатын көлікке арналған болуы мүмкін.

Екі бөліктен тұратын және сопақша ішіндегі X литерасы екі нұсқада да бар. Интернетте символ басқа брендтердің логотипіне мысалы, Xpeng немесе кореялық Hyundai-ге ұқсайтыны сөз болып жатыр. X әрпінің төменгі жағы Chery-дің логотипіне ұқсайды. Логотип симметриялы емес.

X литерасы Lada маркасына тән X стилін меңзеп таңдалған сияқты. Сонымен қатар FAW корпорациясымен бірлесіп шығарғысы келген Lada X-Cross-ты еске түсіреді.

Компания белгіні қолдану туралы жоспарын ресми түрде мәлімдемеді, бірақ қаңтардың басында АВТОВАЗ басшысы Максим Соколов биыл жаңа бренд шығуы мүмкін екенін айтқан. АВТОВАЗ C және D сегментінде (седан мен кроссовер) бірнеше модель құрастыруды жоспарлап отыр.

Бейресми деректерге сәйкес Lada X-Cross жобасы сәтсіз аяқталғаннан кейін Nissan-ға тиесілі болған жерде Chery кроссоверлері жасалады. Инсайдерлердің айтуынша қазірдің өзінде бренд Tiggo 7 Pro моделін ірі торапты әдіспен құрастыру желісін іске қосуға дайындалып жатыр. Дәл осы кроссовер X логотипін бірінші болып алатын сияқты. Қытай автоөндірушілері санкцияға ұшыраған АВТОВАЗ-бен байланысын жария еткісі келмейді, сондықтан локализацияланған автомобильдерге жаңа бренд ойлап тапты.

АВТОВАЗ Санкт-Петербургтегі зауыт пен Тольяттидегі штаб-пәтер арасындағы тікелей байланысқа жұрт назарын аударғанын қаламайды. Бұған дейін Максим Соколов зауыттағы жағдайға қатысты пікір білдіруден бас тартқан. Компания Nissan зауытын сатып алғаннан кейін атауын «Лада Санкт-Петербург» деп өзгертті, ал қазір «Лада» сөзі кәсіпорынның ресми атауында жоқ.