Ресейде шыққан «қытайлық Wrangler» дилерге жетті

«Автотор» Калининградта BAIC BJ40-тың сериялы өндірісін іске қосып, алғашқы көліктерді дилерге жібере бастағанын ресми хабарлады. Компания машина қашан сатылымға шығатынын жариялаған жоқ, бірақ бағасы белгілі. Jeep Wrangler-ге ұқсайтын рамалы көлік кем дегенде 4 059 000 рубль (19.5 млн теңге) тұрады.

«Автотор» маусымда модельдің сынақ нұсқасын құрастырған. Содан бері зауыт жабдық дайындап, қызметкерлерді оқыту жұмысын аяқтады. «Автотор» конвейер BAIC стандартына сай келгенін жазды.

Tank 300-ге бәсекелес болатын жол талғамайтын көлік Ресейде 218 ат күшіне (380 Нм) ие 2 литрлік турбомотормен жүреді, агрегат 8 диапазонды автомат және толық жетекті жүйемен жұмыс істейді. BAIC BJ40 жүзге дейінгі жылдамдықты 11 секундта алады, аралас циклда 100 шақырымға шамамен 10.4 литр отын тұтынады.

BJ40 Ресейде бір ғана комплектацияда сатылады, бірақ жақсы жабдықталған. Жабдықтар тізімінде жарықдиодты оптика, 17 дюймдік диск, экобылғарымен қапталған салон, екі аймақты климат-бақылау, жылытуға болатын кресло, медиажүйенің 10 және 12.3 дюймдік екі дисплейі және артқы көрініс камерасы мен бейнетіркеуіш бар. Өзгеше сырт пішінінен бөлек алып-салуға болатын пластик төбесі модельді ерекшелеп тұрады.

Кей дерек бойынша Ресейдегі BAIC дилерлері машинаны жеткізуге келісімшарт жасай бастады, алғашқы автомобильдер иесінің қолына тамыздың ортасында тиеді.