Ресейде BAIC BJ40 өндірісі басталды

«Автотор» BAIC BJ40 жол талғамайтын көлігінің сынақ нұсқасын құрастырып жатқанын хабарлады. Сериялы өндіріс жақында басталады. «Қытайлық Wrangler» Ресейде қанша тұратыны белгілі. Модель бір комплектацияда сатылады, бағасы — 3 759 900 рубль (20 млн теңге).

Сериялы өндіріс басталғанға дейін зауыт жабдықтарды дайындап, қызметкерлерді оқытады.

BAIC BJ40 — толық жетек жүйесі бар рамалы жол талғамайтын көлік. Ресейде ол 225 ат күшіне (380 Нм) ие 2 литрлік турбомотормен жүреді, агрегат 8 диапазонды автоматпен жұмыс істейді. BJ40-тың ұзындығы — 4.6 метр, дөңгелек базасы — 2.7 метр, клиренсі — 210 мм.

Жаңа өнімнің басты бәсекелесі сипаттамасы ұқсас Tank 300 болады, бірақ BJ40 алып-салуға болатын пластик төбесімен ерекшеленеді. Бұдан бөлек жол талғамайтын көлікте диодты оптика, салонында 10 және 12.3 дюймдік екі экран бар.

«Автотор» топтамасында қазір тоғыз Қытай моделі бар. Кәсіпорын басшысы Валерий Горбунов жыл аяғына дейін олардың саны жиырмаға, тіпті 22-ге жететінін айтты. Зауыт тағы бірнеше Қытай компаниясымен келіссөз жүргізіп жатыр, алда екі жаңа брендпен серіктес болуға ниетті.

«Автотор» 2023 жылы 70 мың автомобиль құрастырып, 60 мың машина сатуды жоспарлап отыр.