Ресей билігі Еуро-0 стандартына сай көлік шығаруға рұқсат береді

Ресей мен Украина арасындағы қақтығыс салдарынан логистика желісі үзілгені белгілі, сондықтан көрші ел билігі экологиялық класы төмен автомобиль шығаруға рұқсат беруге дайындалып жатыр. 2016 жылдан бері ЕЭО аумағында міндетті саналып келген Еуро-5 орнына зауыттар кез келген санаттағы машина жасай алады. Бұл жөнінде «Коммерсантъ» хабарлады.

Анықтама ретінде: Еуро-0 класты автокөлік шығаруға Жапония мен АҚШ-та 90 жылдардың басында-ақ тыйым салынған, ал Ресейде соған ұқсас шектеу 2002 жылы күшіне енді.

Қолда бар ақпарат бойынша бұл уақытша шара екен. Зиян газ көп шығаратын машиналар биылғы 1 сәуір мен 31 желтоқсан аралығында конвейерден түседі. Шенділер мұндай қадамға КАМАЗ шығаратын техниканы заңдастыру үшін баруы мүмкін. Қазір зауыт мамандары Еуро-2 стандартына сай жүк көліктерін құрастырып жатыр.

Шара автоөндірушілердің бәрін бірдей қамтымайтынын айта кеткен жөн. Қызметкер саны 5 мыңнан асатын кәсіпорындар мен жартылай тіркеме, электробус шығаратын зауыттарға, сонымен қатар санкция салқыны тиген компанияларға ғана жеңілдік жасалады.

Құжат бойынша бензинді жеңіл көлік, жеңіл коммерциялық техника және жүк көліктерін кез келген экологиялық класқа сай шығаруға болады. Дизельді машиналардың класы Еуро-1 стандартынан, ал газбен жүретіндердікі Еуро-3-тен төмен болмауға тиіс. Құжатта нейтрализатор қолданудан бас тарту туралы жазылмаған. Егер құрылымда көрсетілген болса, орнатылуы керек.