Өнеркәсіп және сауда министрлігі Renault үлесі бұдан былай мемлекетке тиесілі болатынын хабарлады. Маркаға аталған министрлікке бағынышты Автомобиль және автомотор ғылыми-зерттеу институты иелік етеді. «Рено Россия» зауытын Мәскеу билігі басқарады. Бұл туралы «КоммерсантЪ» басылымы жазды.
Сонымен қатар шенділер Ресейдегі Renault көліктеріне кепіл бойынша кім қызмет көрсететінін айтты. Бұл міндетті билік АВТОВАЗ-ға жүктейді екен.
Қазақстанда жағдай басқаша. Kolesa.kz редакциясына марка өкілдері сервиске қатысты мәселе жоғын айтты. Әзірше бөлшектер көрші елден келіп жатыр, бірақ жуырда жеткіліксіз компонент тікелей Франциядан келетін болады.
Мәскеудегі Renault зауытының жұмысына келер болсақ, Мәскеу басшысы Сергей Собянин өндіріс орнында «Москвич» брендті машиналар шығарылатынын мәлімдеді. Қайта жұмыс бастаған Мәскеу автомобиль зауытының негізгі серіктесі КАМАЗ болады. Соған қарағанда биыл «москвич» тарихының жаңа парағы ашылатын сияқты.
Жүк көлігін шығаратын компанияның да қазір жағдайы мәз емес. Санкция зардабын тартып отырған мекеме министрлікпен бірге көптеп автокомпонент жасауды жоспарлап отыр.
Комментариев: 0