Қызылордада Mercedes-Benz 230 км жылдамдықпен жүйткіді

Әлеуметтік желіде «мерседес» салонында түсірілген видео жарияланды. Ержігіт Пернебаев есімді Facebook қолданушысы ереже бұзған азамат қалада сағатына 200 шақырымнан аса жылдамдықпен жүргенін жазды. Кадрдан жүргізушінің жол жиегінде тұрған полиция көлігін де елемегінін байқауға болады.

Жергілікті полиция департаментінің өкілдері аталған видеоға пікір жазды. Олар Mercedes-Benz жүргізушісі Назарбаев даңғылындағы жылдамдық өлшейтін камераға түсіп қалғанын айтады. Оқиға 10 сәуір күні сағат 6:05-те болған. Тіркелген жылдамдық — 230 км/сағ. Тәртіп сақшылары тұрғынның атына Әкімшілік кодекстің 592-бабы 3-бөлігіне сай хаттама толтырды. Рұқсат етілген жылдамдықтан сағатына 40 км және одан көп асырғаны үшін жүргізушіге 20 АЕК (61.3 мың теңге) айыппұл салынды.

Баспасөз қызметі аталған айыппұл төленгенін мәлімдеді.

Видеодан «мерседестің» ең жоғары жылдамдығы радар тіркегеннен де артық, 240 км/сағ екенін көруге болады. Полицейлер елдегі мұндай антирекордтарды көп жарияламайды. 2020 жылы Нұр-Сұлтан — Щучинск тас жолында сағатына 238 км жылдамдықпен жүйткіген «жетінші» BMW G11 жүргізушісі ең жылдам ереже бұзушы атанған.