2020 жылдың 11 қаңтарынан бастап ҚР ӘҚБК-нің 612-бабы, 1-бөліміне өзгеріс енгізілді. Оған сәйкес, «Өзімен бірге жүргiзушi куәлiгi немесе жүргiзушi куәлiгiнiң орнына берiлген басқару құқығына арналған уақытша куәлiгi, көлік құралына тіркеу және заңнамада белгiленген өзге де құжаттары жоқ жүргiзушiнiң көлiк құралын басқаруы — ескерту жасауға не 5 АЕК мөлшерiнде айыппұл салуға әкеп соғады».
Кolesa.kz тілшісіне ҚР ІІМ ӘПК Әкімшілік практика басқармасының басшысы Марат Тұяқбаев түсіндіргендей, алғашында жүргізушілерге жазбаша ескерту жасалады. Тағы ұсталса — айыппұл салынады. Ел азаматының жүргізуші куәлігінің бар-жоғын және автокөліктің кімнің атына тіркелгенін полицейлер планшет көмегімен деректер базасынан қарай алады. Дегенмен жүргізушілер құжаттарын өзімен алып жүруі және талап бойынша тәртіп сақшысына көрсетуге міндетті.
Егер ұмыт қалған жүргізуші куәлігі не көліктің техникалық төлқұжаты Қазақстанда берілген болса, машина арнайы тұраққа жіберілмейді. М.Тұяқбаевтың айтуынша, тәртіп сақшысының жүргізуші құжатсыз жүрген жағдайда көлікті қолдануға тыйым салуына құқық беретін норма 797-бапта көрсетілген. Алайда ол өндірісті қамтамасыз ету үшін ғана қолданылды. Яғни, машина айып тұрағына жіберіліп, бұл уақытта жүргізушіге қатысты мәлімет бүкіл деректер базасынан тексерілетін. Енді тіркеуге қатысты ақпарат полицейлер үшін қолжетімді, сондықтан құжатын ұмытқандарға мұндай шара қолданудың еш қажеті жоқ.
Тағы да қайталаймыз: бұл тек Қазақстанда рәсімделген жүргізуші куәлігі мен КҚТК-не ғана қатысты. Өзге елдерде есепте тұрған не шетелдік жүргізуші куәлігіне ие азаматтарға тиесілі көліктердің мән-жай анықталғанша айып тұрағына аттануына тура келеді.
Әкімшілік практика басқармасының басшысы қазіргі уақытта заңнамаға енуі тиіс өзгертулер әзірленіп жатқанын және болашақта жүргізушілердің өзімен бірге жүргізуші куәлігі мен техникалық төлқұжатты алып жүруі қажет болмауы мүмкін екендігін айтты.
Естеріңізге сала кетейік, өткен жылдың желтоқсанында мемлекет басшысы үкіметке жүргізушілердің өзімен алып жүруге тиіс құжаттарын азайтуға тапсырма берген болатын.
Комментариев: 0