Қытайлық автоөндіріс басқаларға еліктеумен аты шыққан. Кейбір машиналар өзіндік ерекшелікке ие, кейбірі түпнұсқаға ұқсатып жасалады, өзге көліктің айна-қатесіз көшірмесін шығаратындар да бар. Бүгін талқыланатын Hengtian L4600-де соңғы екі нұсқаның белгілері кездеседі.
Жол талғамайтын көліктің артқы бөлігі рестайлингке дейінгі Toyota Land Cruiser 200-ді еске салады, ал алдыңғы жағы LC Prado-ға аздап ұқсайды. L4600-дің салоны тіпті ерекше.
Көшірме түпнұсқадан үлкендеу (биіктігін айтпағанда). Капот астына ұқсас көлемдегі 4.6 литрлік қозғалтқыш орнатылған. Мотор FT8VG46KH индексіне ие, оны Futai Power Co компаниясы шығарған, 286 ат күшін береді. Агрегат механикамен де, 6 сатылы автоматпен де жұмыс істейді.
Hengtian L4600 алғаш 2016 жылы құрастырылған, содан бері көлік аспан асты елінің жолдарында анда-санда көзге түсіп жүр, бірақ ресми сатылған жоқ. Машинаны компания инженерлері мен әскерилер жол сынағынан өткізді.
Sina.cn порталының хабарлауынша, LC200-дің көшірмесі 2021 жылдың екінші жартысында нарыққа шығады. Бағасы 400 000 юаннан (26.5 миллион теңге) басталады. Айта кетерлігі, Қазақстандағы Toyota диллерлерінде нағыз «екі жүздіктің» бағасы 29.8-41.6 миллион теңге аралығында.
Hengtian L4600 сатылымға шығатын осы жылдың екінші жартысында Land Cruiser 300 де жарық көреді. Бірақ бұл екі машина Қытай нарығында бәскелес болмайды, өйткені Land Cruiser ол елде ресми сатылмайды. 2016 жылға дейін Land Cruiser көліктері FAW-Toyota бірлескен кәсіпорнында шығарылған.
Комментариев: 0