Қытайлар Еуропалық компаниялар тыңшылық етті деп айыптады

Қытай автоөндірушілері Еуроодақ билігінің Қытайдан кіретін электрокарға енгізген импорттық баж салығын көтергеніне жауап ретінде Сауда министрлігіне қозғалтқыш көлемі 2.5 литрден асатын еуропалық көліктер үшін тарифті 25 % көтеруді ұсынды. Мысалы, былтыр Қытайға көлемі үлкен қозғалтқышы бар 250 мыңға жуық көлік кірген. China Daily басылымы соңғы тергеу Қытай компанияларының бизнестегі құпиясын білу үшін сылтау ғана деп хабарлады.

Біраз уақыт бұрын Еурокомиссия Қытай автоөндірушілері мемлекеттік субсидияның арқасында ЕО нарығында баға демпингін жасайтынын анықтау үшін тергеу ұйымдастырған болатын. Қазір осы сылтаумен комиссия компаниялардан іске тікелей қатысы жоқ құжаттарды сұратқан.

Еуроодақ Қытай автоөнеркәсібінің коммерциялық құпиясын ғана емес, энергия сақтау саласындағы жаңа технологиялық мәліметтерді де білуге тырысқан. Маңызды ақпарат беруден бас тартқан компанияларға ЕО ең жоғарғы мөлшерде кедендік баж салығын салған деген болжам бар.

Бір апта бұрын Еуроодақ билігі Қытайдан жеткен электромобиль үшін сұралатын баж салығын көтеру жобасын жариялады. Жаңа мөлшерлеме 17.4-38.1 % аралығында болады және бұл шара Еуропа нарығын көлік жеткізуден оқшаулауға емес, жергілікті және шетелдік өндірушілер үшін тең бәсекелестік қамтамасыз етуге бағытталған. Қытайда бұл туралы теріс пікір қалыптасты. Жаңа баж салығы әзілге де айнала бастады. Ең жоғары мөлшерлемеге SAIC концерніне тиесілі MG бренді ие болды, сондықтан олар 38.1 санын логотипке айналдырып, осы белгімен және «ЕО-да мұқият таңдалған» ұранымен аксессуар шығаруды жоспарлап отыр.

Бірқатар қытайлық концерн кедергілерді айналып өту үшін өндіріс орындарын Еуропаға көшіруді жоспарлап отыр. Олардың қатарында BYD, Chery және Great Wall бар, ал Leapmotor компаниясы Stellantis концернімен бірлескен кәсіпорын ретінде Польшадағы зауытта арзан T03 электрокарын құрастыра бастады.