Қытайда шыққан жарты миллионнан аса Toyota-дан ақау табылды

Toyota Қытайда 2018-2023 жылдары шыққан 570 мың автомобильді (көбі Corolla) сервиске шақырады. Жанармай жүйесіндегі ақауға байланысты машина өртеніп кетуі мүмкін екен.

Компания көлікке тез тозатын жанармай сорғысы (бензонасос) орнатылғанын анықтады. Қысым жоғарылағанда оның кейбір бөлігі ерте тозып, корпуста жарық пайда болуы мүмкін. Салдарынан жанармай ағып, ауыр болғанда өрт шығуы мүмкін. Сондай-ақ жергілікті реттеуші орган аққан жанармай қоршаған ортаға зиян тигізетінін мәлімдеді.

2019-2023 жылдары FAW концерні шығарған 350 мың Toyota Corolla иесі сервис орталығына баруға мәжбүр болады. Кампания 2018-2022 жылдары GAC шығарған 157.5 мың Highlander-ді де қамтиды. Ақау шыққан көліктер тізімінде Қытайға Жапониядан кірген 68.5 мың Lexus RX бар.

Сервис орталығында жанармай сорғысын тексеріп, қажет болса сапасыз бөлшекті ауыстырады. Toyota оған дейін машинаны ашық от маңына қоймауды сұрады. Жанармай ақса немесе бөтен иіс шықса, дереу дилерге хабарласқан жөн.