Қытай жоғары тарифті қолдаған елдерде зауыт салмайды

10 қазанда ҚХР Сауда министрлігінде BYD, SAIC және Geely сияқты жетекші автоөндірушілердің басшылары бас қосқан жиналыс өтті. Reuters агенттігі хабарлағандай, жабық кеңесте билік бизнесмендерге кеден салығын көтеруді қолдаған Еуроодақ елдеріне инвестиция салмай, қаржыны жоғары тарифке қарсы болған елдерге бағыттауды тапсырған.

Содан үш күн бұрын Франция, Польша және Италия сияқты Еуроодақтың 10 мүшесі Қытай электромобильдеріне 45.3 % кеден салығын енгізуді қолдап дауыс берген. 12 мемлекет қалыс қалып, Германия қатарлы 5 ел шешімге қарсы болды.

Қытай электромобильдерінің 40 %-дан астамы Еуропада сатылады, сол үшін Бейжіңнің реакциясын түсінуге болады. АҚШ пен Канада Қытай көліктеріне екі есе салық енгізген, енді бұл тізімге Еуропа нарығы қосылса, елдегі электрокар саны шектен асып, жұмыс күші қысқарып, әлеуметтік шиеленіс пайда болуы мүмкін. Қытай билігі осыған алаңдап отыр.

Биыл жазда Қытай Сауда министрлігі Ресей, Үндістан және Түркия сияқты елдерде толық өндіріс орнын ашпай, тек көлік құрастыратын зауыт салуды ұсынған. Өйткені олар санкциядан және жоғары технологияның жұртқа жария болуынан қорқады.