Қытай тұрғыны электрлі BYD-мен 500 мың км жол жүрген

Аспан асты елінде BYD Han иесі көлігімен үш жылда 500 мың шақырым жүргені белгілі болды. «Китайские автомобили» таратқан апқаратқа сүйенсек, мұны білген компания жүргізушіге жаңа электрокар сыйлапты.

Чжун есімді тұрғын бұрын іштен жанатын қозғалтқышы бар көлік мінген, ал 2020 жылы екі электромотормен жүретін BYD Han флагманын таңдапты.

Машина ұзақ жол жүрсе де, батарея, қозғалтқыш не күштік электрониканың басқа элементтерін ауыстыру қажет болмаған. Чжунның айтуынша ол көлігін апатқа түскен соң ғана бір-екі рет жөндепті. Дегенмен аккумулятордың қуат сақтау қабілеті сәл нашарлағанын байқаған. Су жаңа Han EV-мен еш қуаттамай 550 км еңсерсе, қазір батарея қуаты 400 шақырымға ғана жетеді екен.

Чжун енді жаңа көлік мініп, рекорд жаңарта алады. Өйткені BYD оған Han EV-дің рестайлингтен өткен нұсқасын сыйлады. Жақсарған модель 517 ат күшіне ие агрегатпен жүреді, батарея сыйымдылығы — 85.4 кВт·сағ (бұрын 76.9 еді). Жүріс қоры 610 шақырымға жетуге тиіс.

BYD Han-ды көп ұзамай Қазақстан тұрғындары да тізгіндей алады. Қазан айында компания біздің елде толық электрлі және гибрид модельдерін саудалауға ниетті екенін мәлімдеді.