Қазан айының ортасында Astana Motors қытайлық BYD брендін Қазақстан нарығына қайта әкелетінін ресми мәлімдеді. Осы жолы бренд электромобиль сатуды көздеп отыр. Алғаш болып ұзындығы шамамен 5 метрлік Han седаны сатылады. Көлік құралының типін мақұлдау құжаты жергілікті реестрде жарияланды.
Құжаттарға жүгінсек электрлі седан Қазақстанға тікелей Қытайдан жеткізіледі. Дөңгелек базасы шамамен 3 метрлік көлік алдыңғы және толық жетекті нұсқада сатылады. Алдыңғы жетекті нұсқасы 245 ат күшін беретін бір мотормен, толық жетекті нұсқасы жиынтық 517 ат күшін беретін екі мотормен жабдықталады. Құжатта жүріс қоры 610 және 715 шақырым деп көрсетілген. Моножетекті модификациясының жүріс қоры көбірек болатын шығар.
Бағасы мен комплектациясына қатысты ақпарат жоқ. Дегенмен ресми сатылатын Han «сұр импорт» арқылы елге кірген көліктерден қымбат болады деп сеніммен айтуға болады. Олардың бағасы нұсқасына байланысты 16.4-24.5 млн теңге аралығында. Электромобильдің көктемде белгілі болған Өзбекстандағы бағасына да қарай аламыз. Көрші елде құны 613.6 млн сумнан (шамамен 22.9 млн теңге) басталып, 655.6 млн сумға (24.5 млн теңге) дейін барады.
Комментариев: 0