Қытай билігі қазан айында ҚХР-дан барған электромобильдерге баж салығын көтерген Еуроодаққа шағымданып, Дүниежүзілік сауда ұйымына жүгінді. Бейжің Еуроодақ қате шешім қабылдағанын мойындап, саясатын қайта қарағанын қалайды деп жазды Bloomberg. Біраз уақыт бұрын ЕО тарифтер жария болса да, дау-дамайды шешу үшін Қытайдың сауда министрлігімен келіссөз жүргізетінін растаған.
ДСО-ның дау шешу департаментіне жолданған арызда қазіргі салық сауда протекционизмінің көрінісі деп жазылған. Қытай Еуроодақтың мұндай қадамға баруына еш негіз болған жоқ, ал қабылданған шаралар билікті асыра пайдалану және ДСО ережесін бұзу деп мәлімдеді. Бейжің Еуроодақты электрокар индустриясын жаһандық деңгейде дамыту үшін баж салығынан бас тартуға шақырды.
ЕО келіссөзді жалғастыру мақсатында Қытайға делегация жіберіпті. ЕО сауда комитетінің басшысы Еуропа сауда соғысы болғанына мүдделі емес екенін, бірақ екіжақты қарым-қатынас бұзылса, оны теңшеу керек деп санайтынын айтты. ҚХР өзін Еуроодақтың көлемі жағынан екінші серіктесімін деп есептейді. Агенттік берген мәліметке сүйенсек, былтыр екіжақты сауда көлемі 739 млрд еуроға жеткен.
Еурокомиссия субсидияға қарсы тергеу жүргізген соң енгізген салық мөлшері 45.3 % құрауы мүмкін. Тергеу нәтижесі бойынша сарапшылар Қытай автоөндірушілері мемлекет қолдауымен Еуропа нарығын жаулап алуы ықтимал деген қорытынды жасады. Қытай бұған жауап ретінде Еуроодақтан кіретін тауарларға көптеп салық салуды көздеп отыр. Бұл ел қарт құрлық үшін аса маңызды нарық саналатынын атап өткен жөн.
Комментариев: 0