Қытай экспортқа электропикап шығарады

Бір жыл бұрын Geely Group құрамына электромобиль шығаратын Radar Auto қосылды. Ол Қытаймен шектелмей, шетелге де өнім шығаратын сияқты, 25 шілдеде экспортқа арналған Radar RD6-ның алғашқы партиясы конвейерден түсті деп хабарлады Electrek.

Ұзындығы бес метрден асатын, бес орынды үлкен Radar RD6 пикапы Zeekr 001 және Polestar 4 сияқты SEA платформасына негізделген. Соған сай машина 272 ат күшіне (284 Нм) ие бір электромотормен жүреді, алты секундта 100-ге дейін жылдамдық алады.

Комплектациясына байланысты сыйымдылығы әртүрлі үш батареяның бірін таңдауға болады: базалық нұсқасы 63 кВт·сағ, оның жүріс қоры — 400 км. Орташа түрленімде 86 кВт·сағ батарея бар, ол 550 км жол жүруге жарайды. Ал ең үздік нұсқаға 100 кВт·сағ аккумулятор орнатқан, жүріс қоры — 632 км. Radar RD6-ның барлық нұсқасы V2L (Vehicle to Load) стандартына сай келеді. Ашық жүксалғышының сыйымдылығы — 1200 литр.

Жақсы жабдықталған, салоны жайлы Radar RD6-ның бағасы да қымбат емес. Ең арзанының құны 178 800 юаньнан (25 мың доллар) басталса, үздік түрленімі 268 800 юань (37 мың доллар) тұрады.

Ірі электропикап Қытайдан өзге қай елде көп өтетіні белгісіз, мүмкін Аустралия тұрғындарына ұнайтын шығар, өйткені онда мұндай машиналар танымал әрі қуаттау бекеттері көп. Radar RD6 Қазақстанға да келген, бірақ саны көп емес, қуатты моторы бар қымбат нұсқасы 20 млн теңге тұрады.