ҚАБА мәліметіне сүйенсек, автонарықтағы тұрақсыздыққа қарамастан биыл қыркүйекте 10 517 жаңа жеңіл машина мен коммерциялық көлік сатылды. Өсім бар, бірақ көлік тапшылығы әлі де байқалады. Әсіресе Chevrolet Nexia жетіспей жатыр. Бірнеше ай бұрын бюджеттік седанның мыңдаған данасы өтетін (шілдеде 1721 дана), ал қыркүйекте 398 ғана «Нексия» сатылып, үздік үштіктен шығып қалды, оның орнын Toyota Camry басты. Мұндай жағдай биыл бірінші рет кездесіп отыр. Алайда Chevrolet бөлшек тапшылығы мәселесін шешті, жақын арада «Нексияның» өндірісі мен сатылымы қалпына келеді.
Тағы бір айта кетерлігі, Granta үздік бестікке енді. Lada 9 айдан кейін үздіктер қатарына қайта қосылып отыр. Жаңа Creta да жақсы сатылды. Ал Toyota Land Cruiser 300 өз рекордын жаңартып, 165 данасы иесін тапты (үш айда 447-сі өтті).
2021 жылғы қыркүйек қорытындысы бойынша жаңа көліктер нарығындағы үздік 10 модель
Күздің алғашқы айы дилерлер үшін сәтті болды. Үш тоқсан қорытындысы бойынша сатылым мөлшері көңіл көншітерлік — өсім 36.3 %, жыл басынан бері 86 566 жаңа машина сатылды (79 444 жеңіл машина және 7122 коммерциялық көлік). Бұл 2020 жылғы ұқсас мезгілдегі көрсеткіштен 23 039 дана артық. Осыған қарап, биылғы көлік сатылымы соңғы бес жылдағы үздік көрсеткіштер қатарында болатынын аңғару қиын емес.
2021 жылдың алғашқы тоғыз айында Chevrolet көліктеріне сұраныс жоғары болды — 22 383 машина иесін тапты (2020 жылмен салыстырғанда +523.5 %), екінші орында Hyundai — 17 758 дана (+55.2 %), үштікті Toyota түйіндеді — 10 404 дана (+32.6 %).
Kia да жақсы нәтиже көрсетті — 6993 дана (+49.1 %). 5660 машина сатқан Lada (2020 жылмен салыстырғанда −58 %) бесінші орында тұр. Алтыншы сатыға жайғасқан Volkswagen дилерлері 3398 көлік өткізді (+103.2 %). Жетінші орында Nissan — 2577 дана (+55 %). Үздік ондыққа енген өзге маркалар: Renault (2510 дана; +33.4 %), JAC (1896 дана; +49.5 %) және Lexus (1290 дана; +15 %).
Тоғыз айдың қорытындысы бойынша танымал модельдер тізімінде Chevrolet Cobalt (10 769) пен Chevrolet Nexia (9112) көш бастады. Үшінші орында Hyundai Accent (7502) тұр. Бұл тізім әрі қарай былай жалғасады: Kia Rio (4084 дана), Toyota Camry (4077), Hyundai Creta (2943), Toyota RAV4 (2473), Volkswagen Polo (2321), Hyundai Tucson (1978), Hyundai Elantra (1966) және Lada Vesta (1932).
Биыл көлік сатылымы 2014 жылғы көрсеткішке жақындауы мүмкін, алты жыл бұрын 150 мыңнан астам машина өткен. Бірақ көптеген марка машина тапшылығын сезініп отыр, бұл автонарыққа айтарлықтай кері әсер етеді. ҚАБА мамандарының болжамы бойынша, биыл 110–115 мың жаңа машина сатылады.
Комментариев: 0