Қазақстанда ереже өзгерген соң 18 жасқа толмаған адамға электросамокат мініп жолға шығуға тыйым салынды. Бірақ бұл талапты көбі елемей жүр. Жол қауіпсіздігін қамтамасыз ету жөніндегі үкімет отырысында Ішкі істер министрінің бірінші орынбасары Марат Қожаев қыркүйекте елде кәмелетке толмағандар электросамокатпен жолға шыққан 562 факті тіркелгенін мәлімдеді. Ал жаңа ереже күшіне енген бір айда полиция жол ережесін бұзған 1700-ден аса самокатшыны анықтады.
Бұған дейін Kolesa.kz редакциясы арнайы мақала жазып, электросамокат жүргізу ережесін түсіндірген.
«Бұл мәселені тек полицияның күшімен шешу мүмкін емес. Әкімдіктер инфрақұрылымды дамыту бойынша шара қабылдауы қажет:
- бөлінген жолақтар сызу;
- жеке веложол салу;
- қалада электросамокат пайдалануға тыйым салынған аймақтарды белгілеу», — деді министрдің орынбасары.
Kolesa.kz редакциясы электросамокат мінген адамдар жаяу жүргіншілер жолында жылдамдықты шектен асыратынын байқады. Ережеде жаяу жүргіншілер жолында жылдамдықты сағатына 6 км-ден асырмау керек деп жазылған, бірақ бұл талапты сақтайтындар аз.
Жүргізушілер электросамокат мініп баяу жүру қиын екенін айтады, өйткені тепе-теңдікті сақтау мүмкін емес. Ал тұрғындар заң нормасы сақталуын талап етіп отыр. Бірақ электросамокат тротуарда қандай жылдамдықпен жүргенін анықтау қиын, демек самокатшылардың санасына сенуден басқа амал жоқ.
Тротуар мен жаяу жүргіншілер жолында электросамокат жылдамдығын мәжбүрлеп шектеу мүмкін емес екенін кикшеринг компаниялары да растап отыр.
«Координатты анықтау дәлдігі төмен болғандықтан жүйелі түрде жұмыс істеу мүмкін емес. Геолокацияда қолданылатын GPS технологиясы бойынша координатты анықтауда 20–30 метрге дейін қателік кетеді, бұл тротуар және жаяу жүргіншілер жолы сияқты шағын нысандар үшін өте маңызды. Демек тротуар мен жаяу жүргіншілер жолындағы самокат жылдамдығын пайдаланушы жеке бақылауы қажет», — деді Kolesa.kz редакциясына Whoosh компаниясы.
Тағы бір мәселе — самокатқа екі, тіпті үш адам мінгесіп жүретіндердің көп болуы.
Комментариев: 0