Жалғыз данасы жарық көрген Atlas Cross Sport GT-ге 300 ат күшін беретін 2.0 TSI турбомоторы орнатылған. Жетінші буындағы Golf R-ден алынған қозғалтқыш 7 сатылы DSG роботымен жұмыс істейді. Ал сериялы Atlas моделіне 220 ат күшін беретін турбо немесе 249 «арғымағы» бар VR6 3.6 қойылады. Екеуі де 8 сатылы автоматпен жұптасады. 4Motion толық жетек жүйесінде өзгеріс жоқ.
Кроссовердің жол саңылауы кішірейгенмен, анағұрлым өнімді Tarox тежеуіштері мен 22 дюймдік Abt дөңгелектеріне ие болды. Kingfisher Blue деп аталатын шанақ түсі бізге Arteon Shooting Brake моделі арқылы таныс.
Салонға Recaro фирмасы жасаған спорттық төрт орындық орнатылған. Артқы бөлігіне мамандар ұсақ-түсек салатын жәшік пен USB-порттары бар бокс орнатыпты. Беріліс қорабын қосатын иінтіректің тұтқасы көк түсті күдерімен қапталған. Жалпы көк түсті акцент көліктің кез келген жерінен табылады. Электроникасы бұрынғыдай.
Машина күнделікті қозғалысқа арналмаған. Бұл модель сериялы Atlas-ты жарнамалауға қатысатын шоу-кар. Сондықтан тек жұрт назарын аудару үшін қолданылады.
Комментариев: 0