Қостанай облысында жасырын патруль 4 мыңға жуық ереже бұзу сәтін тіркеді

Қостанай облысының полициясы жолдағы тәртіпті қадағалайтын жасырын патрульдердің бірнеше айдағы жұмысының нәтижесін жариялады.

Polisia.kz мәліметінше, белгісі жоқ экипаждар 2024 жылдың аяғына дейін 4 мыңға жуық жол ережесін бұзу фактісін тіркеген. Жүргізушілерге көбінесе қандай айыппұл салынғаны нақтыланбады, бірақ «Оракул-Инсайт» кешенінің мүмкіндіктері өте кең екені айтылды. Ол жылдамдық режимін сақтамау, бағдаршамның қызыл түсіне өту, қозғалыс кезінде телефон пайдалану, қауіпсіздік белдігін тақпау, тұрақ ережесін сақтамау және жаяу жүргіншіге жол бермеу сияқты әрекеттерді тіркей алады.

Полиция былтыр қыркүйектің аяғында облыста жасырын патрульдеу енгізетінін мәлімдеген. Сол кезде Қостанай облысының жолдарында он экипаж жүргені хабарланды. Елімізде жолдағы тәртіпті полиция көліктері ғана емес, жедел жәрдем де қадағалайды. Мұндай көліктер біраз уақыт бұрын Атырау облысында пайда болды.