Кеңес одағында лауазымды қызмет атқарғандардың барлығы сияқты, Дінмұхамед Қонаев та қызметтік көлік ретінде жоғары класты отандық өнімдерді пайдаланды. Алдымен ЗиС-115, кейін «Чайка» мен ЗИЛ-114, мансабының соңына қарай ЗИЛ-4104 көлігін мінді. Қымбат лимузиндер министрлер кеңесінің гаражында сақталды және ешқашан жеке мүлік болған емес. Ал Димаш Ахметұлы көлікке қызықпаған, сондықтан машина жүргізбепті. Бос уақытында аңға шығып, кітап оқыған және грампластинкамен мен оттық жинаған екен.
Қазақстан Компартиясы Орталық Комитетінің Бірінші хатшысы халық жадында кішіпейіл, ұстамды адам ретінде қалды. Ол таңертең қазіргі Абылай хан мен Бөгенбай қиылысында орналасқан үш қабатты үйден шығып, Үкімет үйіне жаяу баратынын Мадат Аққозин айтқан. Расымен күзетсіз, брондалған кортежсіз, ол өтетін жол да жабылмаған.
1986 жылы аяқ асты биліктен кетіп, артынан Алматыдағы алаңда жастар жаппай көтерілген шақта Қонаев қуғынға ұшырап, бүкіл партия құрылымынан шығып қалады. Дегенмен көп ұзамай кеңес билігінің арыны қайтып, саяси репрессиядан аман қалған бұрынғы басшы Төлебаев көшесіндегі төрт бөлмелі пәтерінде тұрады.
Қазақстан тәуелсіздік алғаннан кейін халық Қонаевты естен шығарған жоқ. 1993 жылы наурызда Мұхтар Аухадиев және Жанат Байқошқаров деген кәсіпкерлер оған су жаңа Pontiac Grand Prix сыйлаған. Өте қымбат әрі аса сәнді болмаса да, көлік саясаткердің көңілінен шығады.
Сыйлық жайлы толығырақ мәлімет берген жөн болар. Алғаш Grand Prix атауы 1962 жылы Pontiac гаммасында пайда болды. 1988 жылы танымал модельдің бесінші буыны жарық көрген соң, «Гран-при» орта көлемді көліктер санатына өтеді. Күрең қызыл былғарымен қапталған седан 200 ат күшін беретін 3.4 литрлік V6 моторымен жабдықталған. Агрегат 4 сатылы автоматпен жұмыс істейді. Көлік алдыңғы жетекті.
Ұзындығы 5 метрге жуық Pontiac Grand Prix радиатор торының орнын басқан қосымша шамымен ерекшеленетін, ал тор бамперге кірігіп тұрады.
Марқұмның інісі Эльдар Қонаевтың айтуынша, оған машина қатты ұнапты. Жұмсақ әрі жылдам қозғалатын «понтиакты» тәжірибелі жүргізуші тізгіндеген. Өкінішке қарай, ол америкалық көлікпен ұзақ жүре алмады. Қонаев қайтыс болған соң Grand Prix Эльдар Асқарұлының иелігіне өткен, ол 2006 жылы машинаны мұражайға сыйлады. Тарихтың бір бөлшегіне айналған көлік әлі сонда тұр.
Қазір АҚШ-та сол буындағы модель арзан бағаланады. Оны 500-1500 долларға алуға болады. Сондықтан дәл осылай жақсы сақталған, әрі көп жүрмеген көлік табу өте қиын. «Гран-при» мінгендер моторы мен гидроавтоматы өте төзімді екенін, бірақ электр құрылғылары мен сезгектерінің сапасы сын көтермейтінін айтады. Одан бөлек генераторына қатысты жиі мәселе туындайды, тежеуіші де әлсіз көрінеді.
Ұқсас Pontiac Grand Prix-ті 1988 жылы АҚШ президенті Рональд Рейган әріптесі М. Горбачевқа сыйлаған. Капиталистік жұмысшылар арнайы құрастырған машина бірден мұражайға жіберіліп, 2009 жылы ғана иесіне қайта оралған еді.
Автор құнды мәлімет берген Эльдар Асқарұлына алғыс білдіреді.
Комментариев: 0