Қыста Батыс Еуропа — Батыс Қытай жолында шұңқыр көбейді. Жүргізушілер әлеуметтік желіге бейнеролик салып, осындай жолдармен жүруге мәжбүр екенін айтып жатыр.
«Қазавтожол» ҰҚ жолдағы ақау Жамбыл облысы, Мерке ауданындағы Қайнар және Аспара ауылының арасында пайда болғанын мәлімдеді. Биыл қаңтардан бері бұл аумақта бетон жабыны мен қорғаныш қабаты бұзылып, ұзыннан және көлденең жатқан жікте шұңқырлар пайда болған. Бұған қалың қар мен ауа температурасының күрт өзгеруі әсер етті. Жол жөндеушілер ауа райы қолайлы болған кезде жолды ретке келтіруге кірісеміз деп уәде берді.
Бұл жол 2012 жылы салынған және он жылда жол төсеміне қатысты мәселе туындамады. Бірақ 2022 жылы қатты ыстықта бетон тақталары көтерілгеннен кейін бірқатар аймақта жолға арнайы полимерленген асфальт төселе бастады. Қайнар мен Аспараның арасы да полимермен қапталған.
Қазір әлеуметтік желідегі суреттер мен бейнероликтерден қорғаныш төсемі де, астындағы бетон да бұзылғанын көруге болады. Неліктен? Басқа трассалар да бүлінуі мүмкін бе? Мамандар жауабын табады деп үміттенеміз.
Комментариев: 0