Қазақстанға жаңарған Kia Sorento мен EV9 келеді

Көлік типін мақұлдау құжаттары сақталатын жергілікті реестрде Kia-ның екі жаңа моделінің құжаты пайда болды. Брендтің ресми дилері олар жақында автосалонға шығатынын хабарлады.

Алғаш рет былтыр жазда халық алдына шыққан рестайлинг Sorento-ның үш конфигурациясы болатыны құжатта көрсетілген. Оның 5, 6 немесе 7 орынды нұсқасы болады.

Автомобиль екі бензинді және бір дизелді күштік құрылыммен жабдықталады. Жергілікті нарықта бұл агрегаттар бұрыннан таныс. Базалық нұсқа ретінде 180 ат күшін беретін 2.5 литрлік G4KM-5 моторы, орташасы 198 ат күші бар 2 литрлік D4HE-5 турбодизелі, ал қуаты жағынан үздігі 249 ат күші бар 3.5 литрлік V6 болады.

1 / 5

• 
• 
• 
• 
• 

1 / 5

Жабдықтар тізімінде қызық ештеңе көрсетілмеген, бірақ Корея нарығына арналған нұсқаның ресми тұсаукесерінен Sorento интерьерінде жаңа мультимедиа кешені, климат-бақылаудың басқаша пульті, қымбат модификацияда болатын 10 дюймдік проекциялы дисплей, саусақ ізін танитын сканер және бейнетіркеуіш болатынын білеміз.

Бренд жаңарған Sorento-ны Қостанайда құрастырады.

EV9-ға келетін болсақ, дөңгелек базасы 3.1 метр және салоны 3 қатарлы (6 немесе 7 орынды) 5 метрлік электромобиль Сеулдегі Kia зауытынан дайын күйде келеді.

Кроссовердің тек 385 ат күшін беретін моторы бар толық жетекті нұсқасы сатылады. Kia мұндай көліктерді сыйымдылығы 99.8 кВт·сағ үлкен батареямен ғана жабдықтайды. WLTP цикліндегі өлшемдерге сәйкес модельдің жүріс қоры 505 шақырымға жетеді, бірақ құжатта дөңгелек өлшеміне қарай 619-674 шақырым деп жазылған.

Екі модельдің де нарыққа шығатын нақты уақыты әлі жарияланбады, бірақ Kolesa.kz редакциясы EV9 біздің елге көктемде келетінін біледі.