Қазақстандағы су тасқыны: қазір жағдай қалай?

2024 жылдың 1 сәуіріндегі жағдай бойынша алты облыстағы жалпы ұзындығы 1380 метр құрайтын 7 жол бөлігі қызыл судың астында қалды. «Казавтожол» таратқан ақпаратқа сәйкес бес облыстағы республикалық маңызы бар алты автожолда қозғалыс тоқтаған.

Қарағанды облысындағы Ақсу Аюлы ауылына жақын маңда су жайылған жолда жүріп бара жатқан үш жүк көлігі тайып, батып кетті.

View this post on Instagram

A post shared by Караганда | Новости | Дороги (@dorogi_karagandy)

Оларды жергілікті халық экскаватор көмегін шығарып алды.

Алматы облысында Ворошилов суқоймасын қоршап тұрған бөгет бұзылып, салдарынан Қарой, Нұрғиса Тілендиев ауылдары мен құс фабрикасына қауіп төнді.

Төтенше жағдайдың алдын алу үшін мамандар Байсерке — Междуреченск тас жолын жапты. Тек түн ортасында, апаттың беті қайтты деген хабар келгенде көлік қозғалысына рұқсат берді.

Құтқарушылар су астына кеткен ауылдарда қалған тұрғындарды тікұшақпен қауіпсіз жерге әкетіп жатыр.

Республикалық шұғыл штаб таратқан ақпаратқа сүйенсек, су басқан елді мекендерден 12 701 адам шықты, арасында 4728 бала бар. Уақытша паналайтын орындарда 6461 адам бар, 2570-і — бала. Төтенше жағдай жарияланған сәттен бері мамандар 4.2 млн текше метр еріген қар суын сорып алған.

Қазір Ақтөбе, Қостанай, Батыс Қазақстан және Абай облыстарында жағдай күрделі. 53 елді мекен қызыл судың астында қалды.

Жақында шұғыл жиналыс өткізген Қасым-Жомарт Тоқаев премьер-министрдің бірінші орынбасары Роман Склярға, су ресурстары және ирригация министрі Нұржан Нұржігітовке қатаң сөгіс жариялады, Ақтөбе, Қостанай және БҚО әкімдеріне қатаң сөгіс бере отырып, лауазымына толық сай емес деді. Атырау, Ақтөбе, Алматы және Павлодар және Абай облысының басшылары да қатаң сөгіс алды. Тасқын сумен күресу процесін енді жаңа вице-премьер Қанат Бозымбаев ұйымдастырады.