Қазақстанда жапон көліктері қалай өтіп жатыр

Қазақстандағы ескі автомобиль нарығында Күншығыс елінің маркалары өте танымал. Kolesa.kz-те сатылып жатқан 178.3 мың машинаның 34.6 мыңы Toyota өнімдері, ал жапон көліктерінің жалпы саны — 66.1 мың. Бірақ жаңа автомобиль нарығында «жапондардың» саудасы мәз емес. Оларды кореялық Hyundai және Kia ығыстырып жатыр. Ал кей сегментте Қытай брендтері күш алып барады.

2019 жылы Camry Қазақстанда ең көп өткен модель атанып, Toyota үздік брендтер тізімінде үштікке енген. 2024 жылғы жеті айдың қорытындысы бойынша Toyota алтыншы орынға жайғасты, ал Camry топ-20 тізімге әрең кірді. Toyota биыл жапон маркалары арасында көшбасшы орнын сақтап қалды.

Toyota

2024 жылғы қаңтар мен шілде арасында Toyota Қазақстанда 5420 автомобиль сатты. Жеті айдағы марканың үздік моделі Camry емес, LC Prado (алдыңғы буын J150 мен жаңа J250) болды. 1187 седан, 1330 жол талғамайтын көлік өтті. Елге жаңа Camry XV80 ресми келсе, жағдай өзгеруі мүмкін.

Қазақстандағы ең танымал «тойота» тізімінде RAV4 кроссовері (1091) үшінші орында тұр. Ал топ-5 тізімге Hilux пикапы (689 дана) мен Corolla седаны (428) енді.

Lexus

Қазақстанда көп сатылған «жапондар» рейтингінде Lexus премиум бренді екінші орында тұр. Бренд дилерлері жеті айда 1961 автомобиль саудалады, оның 1006-сы — Lexus RX. Сондай-ақ 149 дана гибрид RX өткен. Сондай-ақ марка 530 дана LX сатты.

Қазақстандағы ең танымал «лексустің» бірі — GX. Тамыздың басында Lexus модельдің жаңа буынының бағасын жариялады. Бұған дейін салондар оның бұрынғы буынын сатты.

Subaru

«Субару» біздің елде аса көп сұранысқа ие емес, өйткені марка өнімдерінің бағасы жоғары. Дегенмен бренд биыл 704 автомобиль сатып, Жапонияның Қазақстандағы топ-3 маркасының бірі атанды. Компанияның саудасы 2023 жылмен салыстырғанда 17 % төмен болды.

Subaru дилерлері Forester кроссоверін ең көп саудалады. Қаңтар мен шілде арасында модельдің 560 данасы өтті. Екінші және үшінші орынға Outback универсалы (120 дана) мен WRX седаны (23) жайғасқан.

Mitsubishi

Марканың Қазақстандағы топтамасында үш модель ғана бар. Олар —ASX пен Eclipse Cross кроссовері және L200 пикапы. Бренд 468 автомобиль сатты. ASX (328 дана) ең көп өтті. Ал пикаптың 117 данасы, Eclipse Cross-тың 23 данасы сатылды.

Infiniti

2024 жылғы қаңтар мен шілде арасында Қазақстанда 184 дана Infiniti иесін тапты. Атап айтқанда 107 дана QX55, 50 дана QX50 және 26 дана QX80 сатылды. Бұл 2023 жылғы көрсеткіштен (121 машина) біршама жоғары нәтиже.

Бірақ біздің елдегі бренд саудасы жақсаруы мүмкін. Биыл қазанда Қазақстан нарығын Nissan Middle East FZE компаниясы қолға алып, жаңа модельдер жеткізеді.

Nissan

Nissan-ның Қазақстандағы болашағы бұлыңғыр. Бренд саудасы Ресейге қарсы санкцияға байланысты жүрмей қалған, бірақ компанияның Таяу Шығыстағы кеңсесі мен жергілікті серіктесінің арқасында жағдай оңалуы мүмкін. Биыл «Ниссан» бір ғана Pathfinder сатты.

Алдағы уақытта Қазақстан нарығына Patrol қайта оралады. Y62 буыны кейінгі кезде GCC араб спецификациясында ғана сатылып жатыр.

БАӘ-ден келген көліктер жайлы да айта кетейік. Қазақстан азаматтары БАӘ-ден жаңа және жүрген жапон машиналарын әкеліп жатыр. Атап айтқанда, Land Cruiser 70, Mitsubishi Montero Sport (Pajero Sport) және Mitsubishi Xpander сұранысқа ие. Елге Suzuki модельдері де келіп жатыр.