Қазақстанда қандай электромобиль көп өтеді?

Қазақстан жолдарында жүрген электромобильдердің көбі сұр импорт арқылы келген. Бірақ ресми сатылып жатқан батареялы модельдер де бар. Қазір автосалондар қандай электрокар сатады, 2024 жылы олардың саудасы қалай болды деген сұраққа жауап іздеп көрейік.

Қазақстандағы ресми электрокар нарығында көшбасшы кім?

Zeekr сұр нарықта ғана емес, ресми нарықта да бестселлер атанып отыр. Zeekr X-тің өзі (290) өзгелерден екі есе көп өткен. 001 лифтбегін 325 адам сатып алды. Zeekr 615 автомобиль саудалады. Ал биыл сегіз айда елде жалпы 766 машина иесін тапқан.

Қазақстанның электрокар нарығындағы топ-5 модель

Рейтингте Zeekr 001 және X-тен кейінгі үшінші орында Hyundai Ioniq 5 тұр. Қаңтар мен тамыз арасында оның 68 экземпляры өтті. Бірақ көбі (43 данасы) сәуірде сатылған, ал шілдеде бір-ақ көлік иесін тапты. Тамызда бірде-бір данасы өткен жоқ. Қазір ол Hyundai-нің Қазақстандағы топтамасында жоқ. Марка кейінгі бірнеше айда модельді айтарлықтай жеңілдікпен сатты. Толық жетекті 305 ат күшіне ие электромобиль үшін 15 млн теңге сұрады, яғни Tucson-ның орташа комплектациясынан арзан болды.

Төртінші орынға Kia EV6 жайғасты, сегіз айда оның 28 данасы саудаланды. Марка EV6-ның Earth комплектациясын 19.5 млн теңгеге сатады, сондай-ақ қосымша 500 мың төлеп, GT Line нұсқасын алуға болады.

Үздік бестікті BMW iX түйіндеді. Қаңтар мен тамыз арасында клиенттер электрокроссовердің 20 данасын сатып алды. Оның көбі жыл басында өткен. Қазақстанда iX-тің бағасы 46.1 млн теңгеден басталады, бұл сомаға 326 ат күшіне ие агрегатпен жүретін, жүріс қоры 435 км болатын xDrive40 түрленімін алуға мүмкіндік бар. Ал қуаты — 523 ат күші, жүріс қоры — 633 км болатын xDrive50 нұсқасы 52.9 млн теңге тұрады.

Басқа модельдер

Біздің елде батареялы машина көп өтпейді, кез келген марка жүз автомобиль сата алса жақсы көрсеткіш деп бағалауға болады! Биыл сегіз айда 15 дана электрлі Porsche Taycan, 8 экземпляр Audi «Етрон», 7 дана Hongqi және 4 дана Kia EV9 иесін тапты. Сонымен қатар нарықта эксклюзивті екі модель бар. Жыл басынан бері жалғыз дана британиялық Jaguar I-Pace өтті. Одан бөлек қытайлық JAC e-JS4-тің бір экземпляры ғана сатылды. Модельдің Luxury комплектациясы 16.9 млн теңге тұрады.

2024 жылдың 8 айындағы электромобиль саудасы

Бейресми электрокар нарығында кім көшбасшы?

Бұл сегмент туралы нақты статистика жоқ. Бірақ сұр нарық тұрақсыз екені анық, жаз ортасына дейін Zeekr-ге сұраныс көп болған, бірақ телематика бұғатталып қалуы мүмкін деген жаңалықтан кейін оған қызығушылық төмендеді. Қазір тұрғындар Lixiang сияқты гибрид маркаларға назар аударып отыр. Kolesa.kz-те «Ли» модельдерін сату туралы хабарландыру көбейе бастады (қазір 488 хабарландыру бар). Бірақ мұнда да көшбасшы тез ауысатын сияқты.

Ресми және бейресми электромобиль сататын дилерлерде Tesla емес, BYD танымал. Марка бағасы және модель мен агрегат санының көптігімен назар аудартып отыр. Бренд ресми нарыққа шықса, Қазақстан тұрғындарының Build Your Dreams-қа қызығушылығы арта түсуі мүмкін.

Өзбекстанда BYD зауыты ашылған, Ташкентте марка өнімдері көбейіп келеді. Еуразия аумағындағы көлік нарығы жылдам өзгеріп жатқанын ескерсек, біздің елде BYD сияқты электрлі машиналар көбеюі мүмкін.

Осыдан екі жыл бұрын Алматыда электрокар аз еді, олардың саны осы қарқынмен арта берсе, жақында Шымбұлақтағы электромобиль тұрағына машина сыймай қалуы мүмкін.