Қазақстанда 1980, 1990 және 2000 жылдары шыққан неміс автомобильдері өте танымал. Бірақ жаңа «немістердің» бағасы жоғары болғандықтан, сұраныс аз. Volkswagen Polo біраз уақыт Hyundai Accent пен Kia Rio-ға бәсекелес болған. «Үлкен неміс үштігі» деп аталатын Audi, BMW және Mercedes-Benz ресми сатылып жатыр. Олардың арасында қазір қайсысы көшбасшы, қай модель көп өтеді?
Mercedes-Benz
2024 жылдың бірінші жартысында Қазақстандағы Германияның үздік маркасы — Mercedes-Benz. Бренд дилерлері 290 автомобиль сатты. «Мерс» топтамасындағы ең танымал модель — қымбат әрі үлкен GLS кроссовері, оның 85 данасы иесін тапты. Екінші орында GLE Coupe (68 дана), үшінші сатыда S-Class седаны (63) тұр. Оны біздің елде ең көп өткен неміс седаны деуге болады.
Марканы тамымал модельдерінің бірі G-Class туралы да айта кетейік. Алты айда 19 жаңа «Гелик» сатылды.
| Орын | Модель | 2024 жылдың алты айындағы сауда нәтижесі |
| 1 | Mercedes-Benz GLS | 85 |
| 2 | Mercedes-Benz GLE Coupe | 68 |
| 3 | Mercedes-Benz S-Class | 63 |
| 4 | Mercedes-Benz GLE | 33 |
| 5 | Mercedes-Benz G-Class | 19 |
| 6 | Mercedes-Benz GLB | 9 |
| 7 | Mercedes-Benz E-Class | 6 |
| 8 | Mercedes-Benz GLA | 3 |
| 9 | Mercedes-Benz GLC | 3 |
| 10 | Mercedes-Benz C-Class | 1 |
BMW
Бавариялық марка биыл алты айда 226 автомобиль саудалады. Ең танымал моделі X5 кроссовері болды, оның 63 экземпляры өткен. Үздік үштікке енген өзге екі модель де X сериясының өкілі. Екінші орында X7 (39 дана), үшінші сатыда X6 (36) тұр.
Ал Kolesa.kz-те сатылып жатқан BMW көліктерінің 43.4 %-ын құрайтын «бестікке» автосалонда сұраныс аз. Небәрі 5 дана жаңа 5-Series өтті (наурыз бен маусымда екіден, мамырда біреу).
Қазақстандағы жалғыз BMW электромобилі iX кроссоверін 19 адам сатып алды. Жаман көрсеткіш емес. Ал рейтингтегі ең төменгі орын 4-серияға бұйырды, алты айда купенің бір данасы ғана өтті (эмка болуы мүмкін).
Біз бұған дейін BMW өз қаласы Мюнхенде қалай өтетіні туралы репортаж жасаған едік, оны YouTube арнамыздан көруге болады.
| Орын | Модель | 2024 жылдың алты айындағы сауда нәтижесі |
| 1 | BMW X5 | 63 |
| 2 | BMW X7 | 39 |
| 3 | BMW X6 | 36 |
| 4 | BMW X3 | 26 |
| 5 | BMW X4 | 22 |
| 6 | BMW iX | 19 |
| 7 | BMW XM | 8 |
| 8 | BMW 8-Series | 7 |
| 9 | BMW 5-Series | 5 |
| 10 | BMW 4-Series | 1 |
Audi
Қаңтар мен маусым аралығында Қазақстанда 108 Audi өтті. Бренд дилерлері ең көп саудалаған модель — Q7 кроссовері, оның 39 данасы иесін тапты. Топ-3 тізімге Q8 бен A8 кірді. Екі модельдің де 19 экземпляры өткен. S8 және RSQ8 сияқты қуатты түрленімдерді қоса есептегенде де есеп тең болады.
Audi электромобильдеріне де сұраныс төмен. Дилерлер бірер дана Audi Q8 E-tron мен жалғыз E-Tron сатты.
| Орын | Модель | 2024 жылдың алты айындағы сауда нәтижесі |
| 1 | Audi Q7 | 39 |
| 2 | Audi Q8 | 19 |
| 3 | Audi A8 | 19 |
| 4 | Audi A6 | 8 |
| 5 | Audi A4 | 8 |
| 6 | Audi Q5 | 8 |
| 7 | Audi RS Q8 | 2 |
| 8 | Audi S8 | 2 |
| 9 | Audi Q8 E-Tron | 2 |
| 10 | Audi E-Tron | 1 |
Басқа неміс маркалары
Қазақстанда «Үлкен үштіктен» бөлек Германияның тағы екі маркасы сатылып жатыр. Олар — Volkswagen мен Porsche (Audi сияқты VAG құрамына кіреді).
VW модельдік топтамасында екі машина ғана бар: Teramont және Passat. Бірінші модельдің — 23, екіншісінің 41 данасы өтті. Volkswagen дилерлері жалпы 64 автомобиль саудалаған. Ал бір кездері клиенттер «туарегті» таласып жүріп алатын.
Қазақстан тұрғындары алты айда 144 Porsche алды. Оның көрсеткіші Audi-ден жоғары болды! Марка бестселлері Cayenne (68 дана) мен Macan (45), сондай-ақ дилерлер онға жуық 911 сатты. Ал электрлі «поршеге» (Taycan) сұраныс аз болды.
Айтпақшы, Германия автоөндірушілері (Audi, BMW, Mercedes-Benz, Porsche, Volkswagen) биыл қаңтар мен маусым арасында Қазақстанда 832 автомобиль сатты. Дәл осы кезеңде Lexus RX-тің 879 данасы өткен. Жапон маркасы елдегі премиум сегментте жеке көш бастап тұр.
Сіз қай неміс брендін таңдар едіңіз?
Комментариев: 0