Бас прокуратураның Құқықтық статистика және арнайы есепке алу комитеті кейінгі 10 жылдағы жол апаттарына талдау жасады. Мекеме есебіне сай 2025 жылы адам зардап шеккен жол апатының саны 2015 жылмен салыстырғанда екі есеге жуық өсті (18 917-ден 36 146-ға жеткен).
Алматы қаласында 1.3 есе артыпты (2025 жылы — 7620, 2015 жылы — 5552). Астанада көрсеткіш үш есе жоғарылады (2025 жылы — 2074, 2015 жылы — 694). Оқыс оқиғалар Атырау (410-нан 1880-ге), Маңғыстау (410-нан 1672-ге) және Қызылорда облыстарында (381-ден 1446-ға) көп өскен.
Прокуратура дерегінше кейінгі 10 жылда жолда жарақат алғандар екі есе ұлғайған (2015 жылы — 24 084, 2025 жылы — 49 220), ал қаза тапқандар саны көп өзгермеген (он жыл бұрын — 2457, былтыр — 2330).
Прокурорлар биыл жыл басынан 28 қаңтарға дейін елде адам зардап шеккен 1684 жол апаты тіркелгенін атап өтті. Соның ішінде 78 оқиға кісі өлімімен аяқталыпты. Жол апатынан жарақат алғандар Алматы қаласында көп болды (424). Ал қаза тапқандар көп тіркелген (18) өңір — Алматы облысы.
Комментариев: 0