Көлік министрлігі автомобильді техникалық пайдалану ережесіне өзгеріс енгізіп, газбаллон жабдығын орнатушылардың жұмысын реттеуге бел буып отыр. Мекеме қазір бұл қызметті көбіне гаражда орналасқан жеке орталықтар атқарып отырғанын айтты, олардың тиісті рұқсат құжаты жоқ және мемлекеттік органдар бақылай алмайды. Салдарынан жабдық сапасыз орнатылып, айналасына қауіп төндіреді. Өйткені баллон жарылып кетуі мүмкін.
Ережеге өзгеріс енген соң газ баллон жабдығын орнататын сервис орталықтары ҚР СТ 3.55 «Көлік құралына техникалық қызмет көрсету және жөндеу жөніндегі қызметті сертификаттау тәртібі» стандартына сәйкес аккредитациядан өтуі қажет болады. Құжатта ТЖО-да қандай жабдық болу керек екені, қандай маман жұмыс істейтіні жазылады. Сертификаты жоқ компания газбаллон орната алмайды.
«Нәтижесінде жұмыс тәртібі мынадай болады: газбаллонның сапа сертификаты болады, оны сертификаты бар сервистік компания орнатады, содан кейін жабдық екі жылда бір рет зертханада тексерістен, сондай-ақ әдеттегі міндетті техникалық байқаудан өтіп тұрады» деді министрлік өкілдері.
Комментариев: 0