Қазақстанда әр бесінші көлікті әйел тізгіндейді

2019 жылдың алғашқы тоқсанында елдегі мамандандырылған ХҚКО мен ТЕБ мекемелерінде 280 мың нөмір беріліпті, деп хабарлайды ҚАБА. Бұл автокөліктердің басым бөлігінің қайта тіркеуден өткені анық, әрине.

Сандарға сенсек, елдегі автопарк жылдан жылға ескіріп келеді. Себебі тіркелген көлік құралдарының жартысына жуығы шыққанына 20 жылдан асып кеткен (118 594 дана) көліктер. 10-нан 20 жасқа дейінгілердің саны — 71 590 дана. Темір тұлпарлардың 65 866 данасы 10 жасқа дейінгілер болса, 24 772 автокөліктің шығарылғанына үш жылдан аспапты. 3 жасқа дейінгілердің 15 444 данасы, яғни 62 %-ы алғаш рет есепке қойылған.

Қазақстанда ең көп тіркелген көліктердің көшін әлі де Toyota (41 671 дана) бастап келеді. Екінші орында 39 353 данасы тіркелген Lada (ВАЗ) тұр. Үздік үштікті 20 934 данасы тіркелген Volkswagen түйіндейді.

Үлгілерге қатысты айта кетсек, қазақстандықтардың таңдауы барлық жылдарда шығарылған Toyota Camry (16 691 дана) үлгісіне түсіпті. Екінші орында көбіне 90 жылдарда құрастырылған Volkswagen Passat (9 081 дана), ал үшінші орынға Volkswagen-нің Golf (5 863 дана) үлгісі тұрақтаған. Үздік бестікте Daewoo Nexia (5 349 дана) мен Audi 100 (5 098 дана) бар.

Биылғы жылдың алғашқы тоқсанында әр бесінші автокөлік әйел адамның атына рәсімделіпті. Бір қызығы, көліктің түсін таңдауға адамның жынысы еш әсер етпейтін сыңайлы. Жаңа көлік сатып алу барысында ер адамдар мен нәзік жандылар көбіне ақ түсті (5 538 дана) таңдайды екен, одан кейін сұр түс пен оның түрлі реңктері (2 762 дана) және қара түс (1 795) үлкен сұранысқа ие.

PC және LCV брендтерінің үздік ондығы: І тоқсандағы тіркеулер