Жол ережесін бұзғандарды автоматты түрде жазып алатын құрылғы саны артпаса, кемімейтін сияқты.
ІІМ басшысы Марат Ахметжанов елде қазір 17 мың камера жұмыс істеп тұрғанын, бірақ Қазақстан үшін бұл тым аз екенін айтты. Мұндай кешендер Алматы, Астана және Шымкентте көп. Соңғы екі қалада ереже елемейтіндердің 70 %-ын автоматика анықтайды.
Ал біраз аймақта жол қозғалысын қадағалайтын техника саны жүзден аспайды. Бұл тізімде Солтүстік Қазақстан (43), Павлодар (58), Қызылорда (65), Маңғыстау (70), Ақмола (82), Батыс Қазақстан (94) және Түркістан (100) облыстары бар.
Ақылы жолдарда 106 камера орнатылғанын айта кеткен жөн. Көбі жылдамдық режимін тіркемейді. Астана — Бурабай тас жолында тұрған алтауы ғана «Ураган» жүйесіне қосылған.
Сонымен қатар патруль көліктерінде болатын фото-видео түсіретін мобильді кешендер қатары толығуы мүмкін. Қазір сондай 60 машина жолда жүр. Министр Ақтөбе, Алматы, Атырау, Шығыс Қазақстан, Қызылорда, Солтүстік Қазақстан, Жетісу облыстарындағы әкімдіктер бұл құрылғыны әлі алмағанын атап өтті.
Комментариев: 0