Қазақстан ABS-сыз көлік шығаруға рұқсат берді

Көктемде санкцияға байланысты Ресей осындай жеңілдік жасаған. Енді біздің елде де автоөндірушілерге қойылатын талап жеңілдеп отыр.

4 қарашада Қазақстанда шығатын жекелеген Дөңгелекті көлік құралдарына қойылатын міндетті талаптарды қолдану және олардың сәйкестігін бағалау туралы Үкімет қаулысы шықты, құжат 15 қарашадан бастап күшіне енеді. Ол бойынша 2023 жылғы 1 ақпанға дейін Қазақстанда ABS, қауіпсіздік жастығы, SOS батырмасы жоқ және экологиялық класы Еуро-5 стандартынан төмен (Еуро-0-ге дейін) машина шығаруға рұқсат етіледі.

Kolesa.kz редакциясына ҚР ИИДМ түсіндіргендей, Ресей компанияларымен бірге елде «Лада» және УАЗ шығаратын автоөндірушілерді қолдау мақсатында осындай жеңілдік жасалып отыр.

«Hyundai мұндай қарапайым машина өндірмейді деп ойлаймыз, өйткені үкімет қаулысына сәйкес ондай көлікті шетелге экспорттауға және Қазақстаннан тыс жерде жүргізуге болмайды», — дейді министрлік.

Шенділер жақында Қазақстан Республикасы жолдарында жүретін көлік құралдарының рұқсат етілген параметрін бекіту туралы № 342 бұйрыққа өзгеріс енетінін айтты. (Дәл осы құжат елде экологиялық класы Еуро-4 стандартынан төмен, ABS жүйесі жоқ машиналарды алғаш тіркеуге тыйым салады.) Жаңа ереже 1 ақпанға дейін қолданыста болады, бірақ бұл мерзім ұзаруы мүмкін.