Қазақстанда жаңа көліктер өткен жылмен салыстырғанда жақсы сатылып жатыр. Күздің екінші айында 10 288 автомобиль иесін тапты. Бұл қыркүйектегіден сәл төмен (10 517), бірақ 2020 жылғы қазандағы нәтижеден 3.6 % жоғары көрсеткіш.
10 айдағы сатылым тіпті таңғалдырады. Жылдың аяқталуына әлі екі ай бар, дегенмен 96 836 машина өткен, бұл былтырғы осы кезеңнен 31.9 %-ға көп. ҚАБА болжамына сүйенсек, желтоқсанда сатылған көлік саны 115 мыңға жетіп, бес жылдағы үздік көрсеткішке жақындайды. Айта кетерлігі, біздің нарыққа микрочип тапшылығы онша әсер ете қоймаған сыңайлы.
Сатылым нәтижесі бойынша үздіктер көшін Chevrolet (2567) бастады. Екінші орында 1697 өнімі өткен Hyundai тұр. Үшінші орын Toyota (1045) еншісінде. Ал бестікті Lada (1014) мен Kia (861) түйіндеді.
Осы жолы Lada мен Kia-ны ерекше атап өткен жөн сияқты. Жыл басында «Бипэк Автоға» байланысты мәселе туындап, екі марканың да жағдайы нашарлаған еді, жаңа дистрибьюторға өткен соң, саудасы қайта қыза бастады. Қос бренд тек ай ғана емес, жыл нәтижесі бойынша да үздіктер қатарында. Айта кетерлігі, кейін сатыла бастаған Lada қазір кореялық марканы өкшелеп келеді, желтоқсанда Kia-ны шаң қаптыруы ғажап емес. Бұған тек Қостанайдағы зауытта машина жинақтарының жетпей қалуы кедергі келтіруі мүмкін. Қазір АВТОВАЗ конвейері аракідік кідіріп қалып жатыр. Соңғы үзіліс өткен аптаның аяғында болды.
2021 жылғы қазан қорытындысы бойынша жаңа көліктер нарығындағы үздік 10 марка
| Орын | Марка | 2021 жылғы 10 айдағы сатылым (дана) |
| 1 | Chevrolet | 24950 |
| 2 | Hyundai | 19443 |
| 3 | Toyota | 11449 |
| 4 | Kia | 7854 |
| 5 | Lada | 6674 |
| 6 | Volkswagen | 3738 |
| 7 | Nissan | 2980 |
| 8 | Renault | 2761 |
| 9 | JAC | 2189 |
| 10 | Lexus | 1496 |
Модельдерге келер болсақ, 10 айда Chevrolet Cobalt (12 197) пен Chevrolet Nexia (9960) көп сатылды. Үшінші қатарға Hyundai Accent (8087) жайғасса, төртінші орынды Toyota Camry (4500) мен Kia Rio (4496) өзара бөлісті.
Үздік 10 модель тізімінде Hyundai Creta (3194), Toyota RAV4 (2660), Volkswagen Polo (2519), Hyundai Elantra (2304), Lada Vesta (2295) және Hyundai Tucson (2101) бар.
Комментариев: 0