Әлеуметтік желіде Алматыдағы Горная көшесінде қарсы жолақпен жүріп бара жатқан Toyota Camry жайлы видео тарады. Бейнежазба полицейлердің назарынан тыс қалған жоқ. Жол ережесін бұзған жүргізуші табылып, жазаға тартылды.
Алматы қалалық ПД басшысының тергеу ісі жөніндегі орынбасары Рустам Әбдірахманов Instagram желісіндегі жеке парақшасында хабарлағандай, Camry рөлінде 19 жастағы жігіт болған. Осы әрекеті үшін оған бірнеше айыппұл салынды.
Атап айтқанда, сақтандыру полисінің болмауы (Әкімшілік кодекстің 230-бабы 2-бөлігі), қарсы жолаққа шығу (ҚР ӘҚБК 596-бабы 3-бөлігі), жол белгілері және (немесе) таңбаларымен көрсетілген талапты сақтамау әрекетінің қайталануы (ҚР ӘҚБК 601-бабы 2-бөлігі) және бұрылыс сигналын қоспау (ҚР ӘҚБК 595-бабы 1-бөлігі) бойынша хаттама толтырылды. Бәрін қосқанда жас жүргізуші 25 АЕК (72 925 теңге) айыппұл телейді. Сонымен қатар ол алты ай мерзімге көлік жүргізу куәлігінен айырылады.
Жол ережесін бұзған азамат айыппұлдан бөлек, қалыптасқан дәстүрге сай көпшіліктен кешірім сұрады.
Комментариев: 0