Қарлы боран салдарынан елде 127 жол бөлігі жабылды

Қалың қар жауып, көктайғақ болғандықтан Ақмола, Алматы, Шығыс Қазақстан, Жамбыл, Қарағанды, Қостанай, Павлодар және Түркістан облыстарындағы республикалық маңызы бар 49 трасса мен облыстық 78 тас жол жабылды. ҚР ТЖМ берген мәлімет бойынша бір тәулікте құтқарушылар 691 адамды қар құрсауынан босатқан, оның 137-сі бала. Жүргізушілер үшін уақытша жылынатын 838 орын дайындады. Онда қазір 420 адам көмек алып жатыр.

Арқалық — Торғай тас жолында бес машина соғылып, бір адам көз жұмды, тоғыз адам жарақат алды.

Еске салайық, ескертуді елемей, борандатып жолға шыққан жүргізушілер 30 АЕК (2023 жылы 103 500 теңге) айыппұл төлейді немесе 15 тәулікке қамалады.

Алматыда таңға жуық қар жауа бастады. Орталықта 10 см-дей қар түссе, тау жақта 60 см-ге жеткен. Бірнеше жол апаты болды.

Мамандар әзірше магистраль көшелерді ғана тазалап жатыр, брақ бәрін бірден қардан аршу мүмкін емес. Сондықтан олар қар басылғанын күтіп отыр.

Абай болыңыздар!