Қарағанды мен Қапшағай арасындағы жолға биыл толық асфальт төселеді

Қарағандыдан Қапшағайға дейінгі 434 шақырым жол жалпы ұзындығы 946 шақырым болатын Нұр-Сұлтан — Алматы тас жолының бір бөлігі саналады. Елордаға апаратын трассаның 500 шақырымында көлік жүріп жатыр. Kolesa.kz редакциясына ҚР ИИДМ Автомобиль жолдары комитеті хабарлағандай, 2022 жылдың аяғына дейін асфальт төсеп, мына жол бөліктерін ашу жоспарланып отыр:

• Қарағандыдан Балқашқа дейін — 152 км;
• Балқаштан Бурылбайталға дейін — 134 км;
• Бурылбайталдан Күртіге дейін — 89 км;
• Күртіден Қапшағайға дейін — 59 км.

Қазір құрылыс жүріп жатқан жол бөліктерінде уақытша айналма жол салынды.

Биыл жыл соңына дейін асфальттың төменгі қабаты төселген жол бөлігінде көліктердің жүруіне рұқсат етіледі, ал 2023 жылы 400 шақырымнан астам тас жол толық дайын болады. Автомобиль жолдары комитеті жолдың төменгі қабаты ұзақ уақыт қолданылса да сыр бермейді деп сендіріп отыр. Егер ақау шықса, мердігерлер өз қаражатына жөндейді. Қыста асфальттың төменгі қабатына жол жабынына зиян келтірмейтін құм мен тұз төгіледі.