Қазақстан автобизнес ассоциациясының (ҚАБА) дерегіне сүйенсек, биыл алғашқы айда 5 981 көлік шығарылды. Олардың 5 393 данасы жеңіл машина. Бұл өткен жылғы қаңтармен салыстырғанда 3.9 % жоғары көрсеткіш. 2020 жылы қарашада Өскемендегі Lada, Kia, Škoda және УАЗ құрастырған зауыт жұмысын тоқтатқанын ескерсек, бұл нәтиже таңғалдырады.
Қаңтарда «СарыарқаАвтоПром» үздік атанды. Қостанайдағы зауыт 3.6 мың техника (+27.8 %) шығарды. Екінші орынға былтыр ғана ашылған Hyundai Trans Kazakhstan жайғасты. Кәсіпорын 1913 Hyundai құрастырды. Үштікті 100 коммерциялық техника (—66.2 %) жасаған СемАЗ түйіндеді.
Жеңіл машина (+3.9 %) мен автобус (+354 %) өндірісі жақсы өсім көрсетсе, жүк көліктерінің жағдайы онша емес, себебі өндіріс көлемі 33.9 %-ға төмендеді.
Қостанайда қазақстандық өндірушілерге арналған компоненттер шығаратын орталықтың құрылысы аяқталуға жақын. Ал Алматыда Hyundai Trans Kazakhstan үшін бампер мен пластик бөлшектер шығаратын кәсіпорын салынады. Сондықтан алдағы уақытта жергілікті автоөндірістің қарқыны артады деуге негіз бар.
Комментариев: 0