Қыркүйектің ортасында Люблин аймақтық прокуратурасының басшылары мен Польша Республикасының Орталық тергеу бюросы ұйымдасқан қылмыстық топқа қатысы бар деген күдікпен жиырмадан астам адамды ұстады. Тергеу бюросы хабарлағандай, топ 2021-2025 жылдары Польша, Чехия, Литва, Германия және басқа Еуропа елдерінде кәсібін дөңгелеткен.
Күдіктілер автосалондардан BMW, Mercedes-Benz, Porsche, Lexus және Range Rover секілді люкс кластағы автомобильдерді сатып алып, басқа компанияларға қайта сатып, кейін ЕО елдеріндегі жалған клиенттерге жібереді. Ол жақтан қайта Польшаға апарып, Беларусь, Әзірбайжан және Қазақстандағы компаниялар арқылы Ресей мен Беларуське жөнелткен.
Қазір Еуроодақтан Ресейге құны 50 мың еуродан асатын машинаны жеткізуге болмайды, алайда әккі топ Ресей мен Беларуське 600 қымбат көлік өткізіп үлгеріпті.
Санкцияны бұзудан бөлек, күдіктілерге 40 млн злотыйдан (6 млрд теңге) астам салықты негізсіз қайтарып алу, жалпы сомасы 17 млн злотыйдан (2.5 млрд теңге) асатын жалған шот-фактура жасау және ақшаның ізін жасыру сияқты айыптар тағылды. Ұстау барысында тергеушілер эксклюзив сағат, зергерлік бұйымдар және әртүрлі валютадағы қолма-қол ақша тәркіледі. Қаржылық ақпараттың бас инспекторы олардың банк шоттарындағы 10 млн злотыйдан (1.5 млрд теңге) астам қаражатты бұғаттады.
Топ мүшелеріне тағылған кейбір айып ауыр саналады және 5 жылға дейін бас бостандығынан айыру, ірі көлемде айыппұл салу сияқты жаза қолданылады.
Комментариев: 0