Жүргізушілер арасында полицейлердің жол ережесін бұзған мотоциклшілерді қуып жетіп, қағуына тыйым салатын арнайы бұйрық бар деген сыбыс желдей есіп жүр. Мұның рас-өтірігін Kolesa.kz редакциясы ҚР ІІМ-нің өзінен тікелей сұрады. Мекеме бізге берген ресми жауабында ҚР «Құқық қорғау қызметі туралы» заңның 60-бабына сәйкес, егер жүргізуші қызметкердің тоқтату жөніндегі заңды талаптарына бағынбаса, полицейдің көлік құралын тоқтату үшін күш қолдануға, арнайы құралдар мен техниканы пайдалануға құқығы бар екенін айтты.
Бұл норманың мотоциклдер мен мопедтерге де қатысы бар. Олар үшін ешқандай айрықша жағдай қарастырылмаған. Ал теориялық жағынан тәртіп сақшылары велосипедті де қағып тоқтата алады. Себебі олар да жоғарыда заңда аталған көлік құралдарының бірін тізгіндейді. Екі дөңгелекті көлік құралын мінген ереже бұзушыны қағу-қақпау жөніндегі шешімді патрульдік экипаж өз бетінше, құқық бұзу сипаты мен оның айналадағыларға қауіп төндіру деңгейіне байланысты қабылдайды.
Естеріңізде болса, осы жылдың сәуір айында Алматы облысында полицейлерден қашқан мотоциклші жаяу жүргіншіні қағып, мерт қылған. Қаза тапқан жігіттің туыстары қайғылы жағдай тәртіп сақшыларының мотоциклді қағуы салдарынан болуы мүмкін деген болжамды жоққа шығармайды.
Комментариев: 0