208 индексіне ие үлгінің алғашқы суреттері ерте тарап кеткендіктен, француздық компания хэтчбек жайлы толық ақпарат берді. Жаңа көліктің негізінде СМР әмбебап платформасы жатыр. Ол DS 3 Crossback құрылымында да қолданылады. Егер алдыңғысымен салыстырар болсақ, қазіргі көліктің анағұрлым спорттық кейіпке еніп, сүйкімдірек бола түскені аңғарылады. Бұған алдыңғы әйнекті жылжыту арқылы қақпақтың сырттай ұзаруы мен «508» үлгісіндегі азулы оптикасы бар фирмалық стилі ішінара сеп болды.
Қазіргі Peugeot үнемі салонымен таңғалдырып келеді, «208» де одан кенде емес. Дисплейі терең орналасқан аспаптар панелі мен MirrorLink, Apple CarPlay және Android Auto арқылы жұмыс істейтін мультимедиалық кешеннің экраны көзге бірден түседі. Көлік бейімделгіш круиз, қозғалыс жолағын бақылау, тұрақ қоюға жәрдем беретін көмекші, жол белгілерін тану функциясы, жолақта ұстап тұратын белсенді жүйе, көрінбейтін аймақтарды талдау сынды электронды көмекшілердің ауқымды тізімімен мақтана алады.
Қозғалтқыштар гаммасында 100 аттың күшіне ие 1.5 литрлік дизельді мотор да, бензинді агрегат та бар. Соңғысы 1.2 литрлік үш цилиндрлі турбомотор. Ол жылдамдатудың 75-тен 130 күшке дейінгі бірнеше нұсқасында ұсынылады. Қораптардың екі түрі бар: 6 сатылы механикалық беріліс қорабы және 8 сатылы автомат. Десе де 130 аттың күшін беретін моторға механикалық қорап ала алмайсыз.
Көліктің атауында «е» қосымшасы бар элеткрлі нұсқасы 139 күшке ие электрлі мотормен және 50 киловатт-сағат тартатын батареямен жабдықталған. Оның қуаты шамамен 340 шақырымға жетеді. Аса қуатты бекетті қолданғанда 30 минутта толтырып алуға болады.
Үлгінің еуропалық нарыққа шығуы 2019 жылдың күзіне жоспарланып отыр, ал Қазақстанға ол мүлде келмейді.
Комментариев: 0