Парижде кроссоверлерді тұраққа қою қымбаттайды

2024 жылғы 1 қаңтардан бастап Парижде кроссоверлер мен жол талғамайтын көліктерді тұраққа қою бағасын реттейтін жаңа заң күшіне енеді. Мұндай машиналарды тұрақққа қою қымбаттайды.

Оған Париж көшелерінде SUV санының күрт өсуі себеп болып отыр. Кейінгі төрт жылда олардың саны 60 % өсті, жалпы автопарктың 15 %-ы кроссоверлер. Жергілікті билік бұл көліктердің Парижде түкке қажеті жоқ деп отыр. Бұл пікірді қолдамайтын адамдар да бар, олар елде минивэн азайғандықтан, жол талғамайтын көлік көбейді деп санайды, өйткені үлкен отбасылар шағын седанға сыймайды.

Қалада жол талғамайтын көлікті қалай бөлетіні белгісіз, бірақ алдын ала болжам бойынша машинаның салмағы мен көлемін, күштік құрылымын ескереді. Электромобиль үшін жеңілдік қарастырылған. Мысалы, жақында Леон қаласында жаңа ереже күшіне еніп, бір айлық тұрақ ақысы 15 еуро болады, бұл сомаға абонемент алу үшін электромобиль салмағы 2.2 тоннадан, ал ІЖҚ-пен жүретін машина салмағы 1725 келіден аспауы қажет. Бұл шектен асса баға үш есе жоғарылайды (45 еуро). Ал гибрид көліктің салмағы 1.9 тоннадан төмен болуы қажет.