Өзге елдерде бетон жол бүліне ме?

23 маусымда Шымкент — Өзбекстан шекарасы тас жолының 712-шақырымында бетон тақта бүлінгені белгілі болды. Жол жөндеушілер мұндай жағдайға ыстықты кінәлайды. Kolesa.kz бұған дейін осыған ұқсас бірнеше жаңалық жариялады.

Ал басқа елдердегі бетон автобан күннің ыстығына шыдай ма?

Америкалық жол сарапшыларының мәліметінше былтыр жазда АҚШ-тың Висконсин, Миссури, Делавэр сияқты бірнеше штатында қатты ыстықтан жол жабыны бүлінген. Висконсин штатының транспорт департаменті штат аумағында 50-ден аса жерде бетон плита көтеріліп кеткенін хабарлады. Тіпті кей жерде жоғары температураға әдеттегі асфальт шыдас бермеген.

Германияда да жағдай осыған ұқсас. Жақында елдің шығыс бөлігінде қатты ыстықта жолдан ақау шығып, Бранденбург аумағындағы кей автомагистраль жабылды. Дрезденденгі А13 трассасында полиция жылдамдықты 30 км/сағ-қа шектеп, жолда ұзын-сонар кептеліс болды.

Бетон жол бүлінбейтін елдер бар ма?

Жыл бойы аптап ыстық болатын Біріккен Араб Әмірлігінде бетон және асфальт жол аз емес. Бірақ олардың бүлінгенін көп естімейміз. Біріншіден, ақау шыққан жол бөлігі өте тез жөнделеді. Екіншіден, мұнда жол жөндеушілер 50 °C-тан жоғары температураға төзімді полимерлі қоспа мен жергілікті әктас қосылған жоғары сапалы асфальт пайдаланады. Ал бетон тақта қатты қызып кетпеу үшін арнайы полимерлі жабын жағып, деформациялық жікті мұқият күтіп ұстайды.

Аустралия да осыған ұқсас тәсіл қолданады. Бұл елде күннің ыстығынан көбіне асфальт еріп кетеді.

Қытай, Таиланд, Малайзия және Түркия бетон жолды жақсы күтіп ұстайды. Бұл мемлекеттерде трассада ақау көп кездеспейді, бұған жайлы температура әсер етсе керек. Азияда ыстықтан көбіне асфальт жабыны бүлінеді.