Көктемнің соңында Өзбекстан президенті Шавкат Мирзиёев Асакадағы кәсіпорынның жұмысын сынға алып, оны жабуға дейін баратынын айтқан еді. Алайда зауыт жұмысын жалғастырып қана қоймай, үлкен өзгерістер алдында тұрған сыңайлы. Ең алдымен атауы UzAuto Motors деп өзгертілді, ал жуырда ғана президент «Өзбекстан Республикасының автокөлік өндірісін жедел дамыту бойынша қосымша шаралар туралы» қаулыға қол қойды. Оны іске асыру үшін 700 млн долларға жуық қаржы жұмсау жоспарланып отыр.
Құжатта жылдам іске асырылуы тиіс жоспарлармен қатар нақты мақсаттар бар. Мысалы, 2019 — 2023 жылдар аралығында өндіріс көлемін жылына 350 мың автокөлікке дейін арттыру. Бұлардың үштен бір бөлігі экспортқа шығарылады. Сонымен қатар қаулыда локализация деңгейін 60 %-ға дейін арттыру туралы талап бар. Қазіргі көрсеткіштің қандай екені белгісіз, бірақ ол өте төмен деңгейде.
Модельдер қатарын жаңарту ұмытылмады. Халықтың басым бөлігі үшін қолжетімді болатын жаңа заманауи көлік үлгісін жасау міндеттелген. Нақты қандай үлгі туралы сөз болып отырғаны белгісіз. Қазіргі таңда кәсіпорында Chevrolet Spark, Nexia, Cobalt, Tracker, Lacetti, Malibu, Captiva және Damas шығарылады.
Комментариев: 0