Өнеркәсіп және құрылыс министрлігі хабарлағандай, 2016 жылы утиль мен бастапқы тіркеу алымын енгізу ел автопаркін жаңартуға айтарлықтай әсер етті. 10 жастан асқан көліктердің саны азайып, 3 жасқа дейінгі автомобильдердің үлесі артты.
Шенеуніктердің айтуынша, бұл жол-көлік оқиғаларын азайтып, жол қауіпсіздігін жақсартқан. 2022 жылмен салыстырғанда биыл жол апаты 1.5 % азайыпты-мыс. Алайда министрлік мұның утилизация алымына қандай қатысы барын түсіндірмеді.
«Автопаркті жаңарту жол қауіпсіздігіне ғана емес, қауіпсіздік жүйесі жақсырақ көлікті таңдау мүмкіндігін беру арқылы азаматтардың өмір сүру сапасын жақсартуға оң әсер етеді. Ішкі нарықта өндірушілерді ынталандыра отырып, экологиялық таза автомобильге ақырындап көшу саясаты оңтайлы шешім, бұл утиль алымы мен бастапқы тіркеудің арқасында» — деді Өнеркәсіп және құрылыс министрлігі.
eOtinish сайтында жарияланған утилизация мен бастапқы тіркеу алымын алып тастау туралы петицияға 50 мыңнан астам қол қойды, енді үкімет оны жақын арада қарастыруы керек. Өнеркәсіп және құрылыс министрлігі Kolesa.kz редакциясына бұл мәселе бойынша жұмыс тобы құрылмағанын хабарлады.
25 мамырда Epetition.kz порталында утиль алымын жақтайтын «Халық табысын арттыру! Өнеркәсіпті дамыту!» атты петиция шықты, кейбір кәсіпорын қызметкерлері оған «ерікті-мәжбүрлі» түрде қол қойған.
Былтыр Жоғарғы аудиторлық палата утилизация жүйесі белгіленген мақсатқа жетпегенін мәлімдеді. Палата Қазақстандағы автокөліктің орташа жасы керісінше 22 жасқа өскенін және 10 жастан асқан көліктер 2017 жылмен салыстырғанда бір жарым есе көп екенін анықтаған.
Комментариев: 0