Omoda C5-тің артқы дөңгелегінен ақау шықты

Малайзиядағы Chery концернінің кеңсесі Қазақстан мен Ресейде Omoda C5 деген атпен белгілі Omoda 5 кроссоверлерін сервиске шақыратынын хабарлады. Оған әлеуметтік желіде тарап кеткен аспадағы ақау себеп болды.

Chery Omoda 5-тің иесі көлік жүріп келе жатқанда артқы аспаның арқалығы сынғанын, бірақ кроссовер ешқандай шұңқырға түспегенін және жолда шұңқыр болмағанын айтты. Компания хабар алғаннан кейін мәселені тексеруге мәжбүр болды.

Chery өкілдерінің айтуынша оқиғаға сапасыз дәнекерленген жік себеп болған. Бұған аспа компоненттерін жеткізуші кінәлі екен. Мамандар конвейердегі автоматтандырылған дәнекерлеу аппаратына жаңа ұштық салған, бірақ жабдықты қайта калибрлемепті. Компанияның мәліметі бойынша Малайзияда сатылған 600-ге жуық кроссовер тексеруден өтуі қажет. Былтыр 14-17 тамыз аралығында шыққан машиналар ақаулы бөлшектермен жабдықталыпты. Бренд олардың артқы аспасын толық ауыстырады.

Omoda-ның Қазақстандағы өкілдігі Малайзиядағы оқиғаға қатысты пікір білдірмеді, ал 40 мыңнан астам C5 сатылған Ресейде бұл оқиға наразылық тудырды. Компанияның жергілікті кеңсесі Малайзиядағы сервистік науқан Ресей нарығына арналған көліктерге қатысты емес және бұл бірлі-жарым жағдай деп сендірді. Бірақ Omoda C5 иелері үшін жүріс бөлігін ресми дилерде тегін тексеру науқанын іске қосты.