Nissan Шанхай автосалонында Arizon концепт-кроссоверін көрсетті. Концепт ерекше дизайн және жолаушымен сөйлесе алатын озық дыбысты көмекшімен таңғалдырады.
Nissan Arizon-ның футуристік кескіні көз тартады. Шоукардың сырт пішіні қырлы, қатпарлы сызықтардан тұрады. Arizon өзгеше артқы тірек, біріккен рейлинг және агрессивті бамперімен ерекшеленеді.
Торлы диодты жарық техникасы алдыңғы жақта шанақ панеліне, артқы бөлікте жүксалғыш қақпағына салыныпты. Кроссоверде бүйірлік айна мен ортаңғы шанақ тірегі жоқ, есіктері екі жаққа ашылады. Төбесі түсін реттеуге болатын әйнектен жасалған.
Кроссовер интерьерінде рөл-штурвал, үлкен моноэкран және панель бетіндегі сенсорлы батырмалар көзге түседі. Салон жолаушы көңіл-күйіне қарай әртүрлі жарық жағады.
Марка концептіге Eporo деп аталатын дыбысты көмекші орнатыпты. Оның коммуникативті мүмкіндігі жасанды интеллект элементі арқылы жақсарған: Eporo сұрақ мәнін ғана емес, сол сәттегі уақыт немесе ауа райы сияқты сыртқы жағдайды ескере отырып жауап береді. Әзірлеушілер Eporo-мен сөйлесу екі адам арасындағы қалыпты әңгімеге ұқсайды деп отыр.
Arizon сериялы өндіріске шыға ма, белгісіз. Бірақ ол сериялы электроплатформада жасалған, атап айтқанда, Nissan Ariya кроссоверіне негізделіпті. Компания топтамадағы электрокар санын көбейтуді көздеп отыр, жоспар бойынша онжылдықтың аяғына қарай электромобиль саны жиырмаға жетеді. Демек ол болашақта конвейерге тұруы мүмкін.
Комментариев: 0