Tesla серіктесі, әлемдегі ірі литий-ионды батарея өндірушілердің бірі қытайлық CATL (Contemporary Amperex Technology Limited) холдингі дамудың жаңа сатысына өткенін хабарлады. Олар өндіргелі отырған натрий-ионды батарея (NIB) бюджеттік электромобильдерге арналған, бірақ оған премиум сегментіндегі көліктер де қызығушылық танытуы мүмкін.
Натрий-ионды батареяның сыйымдылығы мөлшермен литий-ионды батареямен бірдей, ал қуатты сақтау тығыздығы одан төмен. NIB-дің артықшылығы: мұндай батарея төмен температурада жақсы жұмыс істейді, минус 20 °С-та сыйымдылығының 90 %-дан астамын сақтай алады. Тез қуатталады (15 минутта 80 %-ға толады), одан да маңыздысы — бағасы әлдеқайда арзан болады. Сонымен қатар CATL екі түрлі батареяның ұяшықтарын параллель қосу арқылы біріктіруді ұсынып отыр.
NIB-ді іске қосуға дайындық жұмыстары жақында басталады, процесс біртіндеп жүзеге асады. Ал сериялы өндіріс 2023 жылдан ерте басталмайды. Болжам бойынша, тұтынушылардың натрий-ионды батареяға жұмсайтын шығыны литий-ионды батареяның жартысындай ғана болады. Демек электромобильдің өзіндік құны айтарлықтай төмендейді деген сөз.
Комментариев: 0